Еланкаларга (Хаҥалас) үс бүк үөрүүлээх тэрээһин буолла. «Гармонь моя ямщицкая» диэн өрөспүүбүлүкэтээҕи бэстибээл ыытыллыбытын туһунан А.Е.Кулаковскай аатынан норуоттар доҕордоһууларын дьиэтин пресс-сулууспатыттан иһитиннэрэллэр.
Ол курдук, Еланкаҕа дьаамсыктар удьуордара, бастыҥ хормуоскаһыт, «Гармонист золотой десятки гармонистов ямщицкого тракта» үрдүк аат хаһаайына Борис Анатольевич Добрянцев кэриэһигэр бу долгутуулаах тэрээһин ыытыллыбыт. Түһүлгэни 2-с Малдьаҕар нэһилиэгин дьаһалтата уонна «Күн судаар дьаамсыктарын удьуордара» өрөспүүбүлүкэтээҕи уопсастыбаннай тэрилтэ тэрийбит, иилээн-саҕалаан ыыппыт.
Тэрээһиҥҥэ Саха сирин улуустарыттан күн судаар дьаамсыктарын удьуордара, кэнчээри ыччаттара мустубуттар. Бу бэстибээл Еланка уонна Дьаамсыктар күннэрин кытары алтыһан биир күҥҥэ ыытылларын тэрийээччилэр бэлиэтээн эппиттэр.
—Онон үөрүү үс төгүл үрдээтэ. 14 гармонист, 5 солист уонна 9 ансаамбыл кытынна. Нүөмэрдэригэр хормуоска туһунан ырыа баар буолуохтааҕа ирдэннэ. Хормуоскаһыттар: Валерий Варфоломеев, Геннадий Петров, Сергей Петров, Данил Гребнев, Александр Добрянцев, Андрей Филиппов, Леонид Тетюхин, Иван Федотов, Евгений Добрянцев, Алексей Петров, Николай Емельянов, Николай Наумов, Михаил Золотарев уонна Валерий Филиппов бааллар. Солистар: Елизавета Сергеева, Алина Филиппова, Зинаида Добрянцева, Тамара Макарова, Ирина Стрекаловская уонна «Дьаамсыктар» репертуардаах трио: Галина Сергеева, Наталья Иванова и Татьяна Пальчиковская, кинилэри сэргэ, “Ямщицкий перезвон”(сал. Анастасия Павлова), “Бубенцы над Леной”(сал. Валентина Петрова), “Сударушка”(сал. Наталья Иванова), “Реченька”(сал. Лидия Яйлиян), «Ленские зори» (сал. Светлана Дружинина), “Ямские бубенцы”(сал. Ирина Стрекаловская), “Вольница”(сал. Юрий Павлов), “Павловские вечерочки” (сал. Мария Сидорова), “Раздолье” (сал. Лидия Яйлиян) кытыннылар.
Бэстибээл бары кыттыылаахтарын уонна ыалдьыттары «Күн судаар дьаамсыктарын удьуордара» өрөспүүбүлүкэтээҕи уопсастыбаннай тэрилтэ бэрэссэдээтэлэ, СӨ норуотун хаһаайыстыбатын үтүөлээх үлэһитэ Анатолий Анатольевич Добрянцев эҕэрдэлээтэ: —Еланканы биһиги, дьаамсыктар удьуордара, сөбүлээбиппит ыраатта. Оччолорго манна өрөспүүбүлүкэбит иккис Бэрэсидьиэнэ Вячеслав Анатольевич Штыров салалталаах бырабыыталыстыба улахан дэлэгээссийэтэ кэлэ сылдьыбыта. Олохтоохтору уонна биһигини, дьаамсыктар удьуордарын кытары кэпсэтэн, санаабытын истэн, сүбэлэһэн баран, Еланканы туристар болҕомтолорун тардар курдук оҥорорго быһаарбыттара, — диэн аҕынна. Кини салгыы «Күн судаар дьаамсыктарын суолунан» кинигэ ааптара, уопсастыбаннай диэйэтэл Анатолий Дмитриевич Соколов дойдулаахтарын кытары 2001 сыллаахха кыһыл кирпииччэттэн чочуобуна туппуттарын кэпсээтэ. Манна даҕатан, Анатолий Дмитриевич кэргэнин Вера Александровнаны кытары быйыл 80 саастара диэн этиитэ ытыс тыаһынан арыалланна. Оттон Соколов тус бэйэтэ: «Еланка сүрэхпэр саамай чугас, баар-суох соҕотох сирим», — диэн билинэр.
СӨ урбаан, атыы-эргиэн уонна туризм миниистирэ Ирина Сергеевна Высоких уонна СӨ Тас сибээскэ уонна норуоттар дьыалаларыгар миниистири солбуйааччы Владимир Николаевич Васильев мустубут дьону-сэргэни истиҥник эҕэрдэлээтилэр, бу тэрээһин сайдан, кэҥээн норуоттар икки ардыларынааҕы таһымнанарыгар баҕардылар.
«Вольница» ансаамбыл кыттыылааҕа, 11 саастаах Алёша Бондаренко:
—Мин манна аан бастакы кэлиим. Наһаа үчүгэй айылҕалаах сир-дойду эбит. Бу ырыаҕа уонна талааны, дьоҕуру көрдөрүүгэ куонкурус буолуо дии санаабытым, атын эбит. Манна дьон оҕолуун-уруулуун төгүрүччү хоробуоттууллар, чочуобуна таһыгар оонньуу, көр-нар бөҕө тардыллар, айылҕаҕа хаартыскаҕа түһэллэр, үөрүү-көтүү бөҕө. Бэртээхэй бырааһынньык», — диэн үөрүүтүн үллэһиннэ.
Түмүккэ, долгутуулаах тэрээһин бары кыттыылаахтара дипломнары туттулар уонна бэстибээл значоктарынан наҕараадаланнылар, — диэн иһитиннэрдилэр.
Хаартыскалар: А.Е.Кулаковскай аатынан норуоттар доҕордоһууларын дьиэтин пресс-сулууспата