Ааспыт нэдиэлэҕэ Хаҥалас улууһун Өктөм оскуолата саахалланар туруктаах буолан, күн бүгүҥҥүттэн сабыллан эрэр үһү диэн сурах тарҕаммыта. Эбиитин чэппиэргэ нэһилиэк мунньаҕа буолар үһү диэн иһиллибитэ. Кыс ортото оскуоланы сабан кэбиһэр, эбэтэр үөрэнээччилэри ылбычча атын оскуолаҕа көһөрөр уустуга биллэр. Аттынааҕы нэһилиэктэргэ даҕаны бүтүн биир оскуола оҕотун барыларын батараллара саарбах. Итиэннэ кыһын тымныыга оҕону оскуолаҕа таһар уустук.
П.И.Шадрин аатынан Өктөм орто оскуолата 1976 сыллаах тутуу. Оскуола 2013 сылтан саахалланар туруктааҕа биллибит. Күн бүгүн 200-тэн тахса оҕо үөрэнэр.
СӨ Үөрэҕин уонна наукатын министиэристибэтин хоруйа:
— Кулун тутар 2 күнүгэр миниистири бастакы солбуйааччы М.Ю.Присяжнай, Хаҥалас улууһун үөрэҕин управлениетын начаалынньыга Е.А.Мартынова уонна оскуола дириэктэрэ К.Ф.Афанасьева тустаах эбийиэги көрбүттэрэ.
Өктөм уопсай үөрэхтээһин оскуолатыгар ыытыллыбыт тэхиньиичэскэй туругун бэрэбиэркэтэ 2013 сыл сэтинньи 11 күнүнээҕи Аак суруйбутугар, оскуола саахалланар туруктаах, чөлүгэр түһэриллибэт.
Хаҥалас оройуонун суута оскуоланы “сабарга” диэн быһаарбатаҕа, балаҕан ыйын 1 күнүгэр диэри П.И.Шадрин аатынан Өктөм уопсай үөрэхтээһин оскуолатын үөрэнээччилэрин, куттала суох бары ирдэбилгэ эппиэттиир дьиэҕэ үөрэтэри хааччыйар миэрэлэри ыларга диэн эппитэ. Ити аата, өскөтүн тустаах дьиэҕэ үөрээнээччилэр сылдьалларыгар куттал суох буолуутун хааччахтыыр тэхиньиичэскэй сатайыылары (итэҕэстэри) туораттахха, үөрэҕи салҕыахха сөп.
Кулун тутар 2 күнүгэр Саха сирин Үөрэҕин уонна наукатын миниистирэ В.А.Егоров уонна Хаҥалас улууһун баһылыга Г.Ю.Алексеев оробуочай көрсүһүү кэмигэр бөҕөргөтөр үлэлэри 2018 сыл балаҕан ыйын 1 күнүгэр диэри ыытарга диэн быһаардылар. Тустаах үлэни оҥорорго үп-харчы муниципальнай тэриллии 2018 сыллааҕы бүддьүөтүгэр көрүллүбүт. Бэлиэтээн эттэххэ, оскуолаҕа үөрэх салҕанар.
Оччотугар оскуола хаһан тутуллар? “Развитие образования Республики Саха (Якутия) на 2016-2022 годы и на период до 2026 года” судаарыстыбаннай бырагыраама “Содействие созданию новых мест в общеобразовательных организациях Республики Саха (Якутия) в соответствии с прогнозируемой потребностью на 2016-2025 годы” хос бырагырааматыгар олоҕуран, Хаҥалас улууһун Өктөм сэлиэнньэтигэр 220/100 миэстэлээх оскуола-оҕо саадын тутуута 2021-2022 сылларга былааҥҥа киирбит. “Якутпроект” ААУо бырайыактыыр-симиэтэлиир докумуонун оҥоро сылдьар үһү.
Ону тэҥэ, тустаах эбийиэк СӨ экэниэмикэтин үүнүүтүн сайдыытын кииннэрин социальнай сайдыыларга былаанын бырайыагар хабыллыбыт. Былаан олоххо киирэригэр 1 748,70 мөл. солк. суумалаах барыллаан эбийиэктэр уонна тэрээһиннэр сөбүлэһиллибиттэр итиэннэ 4 634,86 мөл. солк. суумалаах резербэҕэ маннык эбийиэктэри киллэрэргэ диэн этиигэ эбийиэктэр быһаарыллыбыттар. Өктөм 220/100 миэстэлээх оскуола-оҕо саадын эбийиэгэ 522,00 мөл. солк. холбуу суумалаах федеральнай бүддьүөттэн көрүллэр харчылаах Саха Өрөспүүбүлүкэтин уһулуччу суолтаах эбийиэктэрин испииһэгин бырайыагын резербэтигэр хабыллыбыт.
Людмила ПОПОВА, “Саха сирэ” хаһыат, edersaas.ru
Хаартыска интэриниэттэн.