Былыр былыргыттан сахалар кэрэҕэ тардыһыылара, ойуулуур, уһанар, уруһуйдуур дьоҕурдара хааннарыгар баар.
Билиҥҥи сайдыылаах олоххо киһи уһуйуллан дьоҕура, талаана арыллар.
Геннадий Георгиевич Гуляев Новосибирскайдааҕы художественнай училищеҕа «декоратор-оформитель» идэтигэр үөрэммитэ.
Сунтаар улууһун Элгээйитээҕи Култуура дьиэтигэр худуоһунньук-оформителинэн үлэлээбитэ.
Онтон 2009 сылтан Б.Н.Андреев аатынан Айылҕа түмэлигэр таксидермиһынан үлэлиир. Геннадий Георгиевич былакааттары суруйар, кыраасканан уруһуйдуур, чуучалалары оҥорор. Дэгиттэр талааннаах киһибит үлэтиттэн быыс булан, уус-уран самодеятельноска көхтөөхтүк кыттар.
Норуот ырыаһыта
С.А.Зверев-Кыыл Уола «Кулан кугас аттаах Куллустай Бэргэн» олоҥхотугар Хаардьыт Мохсоҕоллой, «Хара саһыл» трагедиятыгар Эрбэхтэй оруолларын толорбута.
Бу айымньылар көрөөччүгэ тиийэллэригэр, оруоллар толору арыллалларыгар улахан тирэх буолар декорациялар эмиэ Геннадий Георгиевич кыттыылаах оҥоһуллубуттара. Кини сүдү киһиэхэ сүгүрүйүүтүн бэлиэтин, кини мэтириэтин ириис куруппаҕа түһэрэн хартыына оҥорон, фольклор түмэлигэр 2010 сыллаахха бэлэхтээбитэ.
Бу хартыыната 80 см үрдүктээх, 60 см кэтиттээх. Норуот ырыаһытын мэтириэтэ С.А.Зверевкэ анаммыт «Аҕам туһунан аман өс» кинигэ тас өттүгэр баар ойууну дьүһүйэн оҥорбут. Кинигэни Дмитрий Сергеевич Зверев хомуйан, эрэдээктэрдээн таһаарбыта, тас көстүүтүн худуоһунньук В.Н.Игнатьев оҥорбута.
«Саха сирэ», edersaas.ru анаан Ксения СЕМЕНОВА.
С.Зверев аатынан мусуой хаартыскалара