“Эксперт Телеком” Саха сиринээҕи хампаанньа Саха сирин норуоттарын спортивнай оонньууларын хаачыстыбалаах сибээһинэн хааччыйыаҕа
Бэҕэһээ, кулун тутар 11 күнүгэр, Амма сэлиэнньэтигэр Саха Өрөспүүбүлүкэтин норуоттарын VII спортивнай оонньууларын тэрийэр кэмитиэтэ, Амма улууһун дьаһалтата уонна “Эксперт Телеком” хампаанньа сибээс өҥөтүн оҥорууга сөбүлэһии түһэристилэр.
Докумуон интэриниэккэ киириигэ, хаачыстыбалаах суотабай сибээһинэн уонна Амма, Чапчылҕан сэлиэнньэлэрин спортивнай эбийиэктэриттэн быһа биэриини тэрийиигэ өрүттэр эбээһинэстэрин бигэргэтэр.
“Эксперт Телеком” хампаанньа дириэктэрэ Евгений Керемясов спорт эбийиэктэрин сибээс оптическай линияларыгар холбооһуҥҥа тутар-таҥар үлэлэр ыытылла туралларын иһитиннэрдэ. “Оонньуулар ыытыллар кэмнэригэр биһиги хампаанньабыт оонньуулар кыттааччылара уонна ыалдьыттара эрэйэ суох кэпсэтэллэрин, хаартыска ыыталларын, мессенджердэргэ уонна социальнай тиһиктэргэ үөрүүлэрин, санааларын үллэстэллэригэр бары күүһүн ууруоҕа”, — диэтэ кини. Илии баттаммыт докумуоҥҥа олоҕуран, хампаанньа “Саха” НКИХ быһа биэриилэрин тэрийэригэр түргэн тэтимнээх сибээһинэн хааччыйыаҕа.
Саха сирин инновацияҕа, цифровой сайдыыга уонна инфокоммуникационнай технологияларга миниистирин солбуйааччы Чокуур Гаврильев иһитиннэрбитинэн, “оптоволокно линияларын киэҥ хабааннаахтык тутуу өрөспүүбүлүкэ улуустарыгар ыытыллар бөдөҥ тэрээһиннэртэн быһа биэриилэри хааччыйар кыаҕы биэрэр”.
“Бу үөрүүлээх, — диэтэ кини. – Билигин элбэх көрөөччү уонна “ыалдьааччы” бу улахан күрэхтэһиилэри көрөр кыахтаныаҕа”.
Ася СОЛОВЬЕВА