Экспедиция кыттыылаахтара Арктикаҕа Toyota массыыналарынан айанныахтара
Бүгүн, тохсунньу 23 күнүгэр, Саха сирин Ил Дархана Айсен Николаев «Евразия биир уһугуттан биир уһугар» экспедицияҕа старт биэрдэ. Арктика айаннааччылара TOYOTA массыынанан саҥа экспедицияҕа туруннулар. Бу сырыыга Toyota бренд бэрэстэбиитэлэ Богдан Булычев салайааччылаах экстремальнай хамаанда, Арктикаҕа экспедициятын Тымныы Полюһун нөҥүө барар сыаллаах.
edersaas.ru
Богдан Булычев – полярнай үөрэтээччи, аан дойду бастыҥ Арктическай блогера, «РГО Экспо» экспедициятын уонна тревел-бырайыагын тэрийээччитэ. Кини Айсен Николаевка бу бырайыагын туһунан кэпсээтэ:
—Экспедиция биир сүдү сыала диэн – аан дойдуга бастакынан массыынанан Арассыыйа биир саамай дьикти сиригэр, Новосибирскай арыыларыгар тиийии. Арктика бу кэрчигэ саамай ыарахан. Аан дойду үрдүнэн ким даҕаны бу суолунан айанныы илик.
Экспедиция кыттыылаахтара маҥнай Халыма федеральнай трассатынан айанныыллар, онтон кыһыҥҥы суолларга киириэхтээхтэр. Ол кэнниттэн, суола суох сиринэн, тыһыынчанан килэмиэтири барар сыаллаахтар.
Новосибирскай арыылар архипелагтарын Стадухин, Ляхов, Санников, Делонг, Толль курдук биллиилээх учуонайдар үөрэппиттэрэ. Билигин «ПРО ПУТЕШЕСТВИЯ» диэн хамаанда уочарата.
Богдан Булычев Ил Дархантан Саха сирин дьаралыгын наклейкатын массыынаҕа сыһыарарыгар көрдөстө. Айсен Николаев экспедицияҕа ситиһиини уонна таһаарыылаах үлэни баҕарда.
Экспедиция кыттыылаахтара отут күн, суолларын улахан аҥарын тыйыс усулуобуйалаах хотугу эргимтэнэн айанныахтаахтар.
Экспедиция кэмигэр, кыттааччылар элбэх сиэрийэлээх киинэни устар былааннаахтар:
— Саха сирин саамай тымныы күннэригэр кэлбиппит олус үчүгэй. Бэртээхэй видеолары устан эрэбит. Тымныы полюһугар ойбоҥҥо сөтүөлүөхпүт. Ол кэнниттэн Тополинайынан Үөһээ Дьааҥыга барыахтаахпыт. Салгыы Уус Куйга, Нижнеянскай, Хаһаачыйа, Дьүкээгир сэлиэнньэлэринэн, Хотугу муустаах муораҕа тахсыахтаахпыт. Кытылынан Новосибирскай арыыларыгар кэлиэхтээхпит. Төттөрү кэлэрбитигэр эмиэ биэрэгинэн Индигирка өрүс төрдүгэр тиийэбит. Эбэтэр Депутскайга түһүөхпүт. Ону таһынан, Чокурдаахха уонна Русскай Устьеҕа сылдьыахтаахпыт. Дьокуускайга олунньу бүтүүтэ кэлэр былааннаахпыт, – диэн Богдан Булычев кэпсиир.
Экспедицияҕа Toyota Hilux уонна Toyota Land Cruiser Prado массыыналарынан барыахтара. Массыыналар номнуо бэйэлэрин кыахтарын көрдөрбүт Arctic Trucks диэн сериялаахтар.
Экспедиция хаамыытын туһунан пропутешествия.рф саайтка көрүөххэ сөп.
СӨ Бырабыытылыстыбатын уонна СӨ Ил Дарханын пресс-сулууспата.
Андрей Сорокин хаартыскалара.