СӨ Экология министиэристибэтин үлэһиттэрэ Намсыыр суолун 4 км уонна «Таптал хайатын» («Сопка любви») сирин-уотун ыраастаатылар, өрө тартылар.
Субуотунньук ойуур пуондатын ыраастааһын былаанынан уонна СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэ төрөөбүт күнүгэр ананна диэн тустаах министиэристибэ иһитиннэрэр.
Тэрээһиҥҥэ барыта 120 киһи кыттыыны ылбыт, 500-тэн тахса куул бөх-сах хомуллубут, 22 кубометр улахан кээмэйдээх бөх тиэллибит. Бөҕү-саҕы «Жилкомсервис» МУП булдьозера уонна КАМАЗ таспыттар. Бэлиэтээн эттэххэ, айылҕа харыстабылын үлэһиттэрэ куораты уонна чугастааҕы сири-уоту ыраастааһыҥҥа куруутун тахсаллар. Кинилэр үтүө дьыалаларынан дьоҥҥо-сэргэҕэ холобур буолаллар.
СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэ эрэгийиэн бары олохтоохторун экологическай субуотунньукка кытталларыгар, сири-уоту ыраастык тутарга, үүнэр көлүөнэни тулалыыр эйгэҕэ харыстабыллаахтык сыһыаннаһарга үөрэтэллэригэр ыҥыраллар. Төрөөбүт сирбит-уоппут айылҕатын харыстыырга хас биирдии киһи кыһамньыта, кылаата улахан суолталааҕын бэлиэтииллэр.