Эһиил Россияҕа Тулалыыр эйгэни харыстааһын сылынан биллэриллэн турар. Бу сылынан сибээстээн биһиэхэ бөҕү-саҕы хомуйууга ураты болҕомто ууруллуоҕа. Бу туһунан Айылҕа харыстабылын миниистирэ Сахамин Афанасьев олохтоох салайыныы сэбиэтигэр иһитиннэрдэ.
Бөҕү-саҕы хомуйууга, кытаанах бөҕү туһаҕа таһаарыыга эһиил регионнааҕы оператор ананыахтаах, анал систиэмэ оҥоһуллуохтаах. Санатан эттэххэ, билигин ити боломуочуйа муниципальнай таһымтан региоҥҥа бэриллэн турар. Манна даҕатан өссө, РФ президенэ Владимир Путин быйылгы Анал этиитигэр бу боппуруоска ойуччу миэстэни уурбутун санатыым. Онон Россия да, регион да салалтатын өттүттэн бу чааһыгар муниципальнай тэриллиилэргэ ураты болҕомто уурулунна.
Иккиһинэн, эһиил ураты харыстанар сирдэрбитин кэҥэтиигэ үлэ барыаҕа. Миниистир Сахамин Афанасьев бэлиэтииринэн, бу сирдэри 1 мөл. кв км диэри кэҥэтэр былааннаахтар. Билиҥҥи туругунан, 933 тыһ. кв км тэҥнэһэн турар. Ордук муницпальнай таһымҥа күүстээх үлэ барыаҕа. Быйыл Нам улууһугар “Бэс Чагда” уонна Ньурбаҕа “Марха”, “Сата” резерваттары докумуоннатыы түмүгэр 15 тыһ. кв км элбээбит.
Маны таһынан ууга барар кутталлаах сирдэри кыраныыссалааһын, айылҕаны харыстааһын, көҕөрдүү үлэлэрэ күүтэллэр. Билигин 22 улууска Экология сылын ыытыы былаана оҥоһуллубут.
Аграфена КУЗЬМИНА.