Экология министиэристибэтэ: өрөспүүбүлүкэҕэ ойууру маассабай кэрдии ыытыллыбат

Бөлөххө киир:

Бу күннэргэ социальнай хабааннаах ситимнэргэ уопсастыбаннас Алдан оройуонугар Амма үөһээ баһыгар ойууру кэрдиини маассабайдык утарарын туһунан иһитиннэрии тилийэ көттө.

Манна «ойууру маассабай кэрдии» диэҥҥэ тохтоон ааһыахпыт. Ол курдук, баар сокуонунан салайтарыллан, Саха сирин сиригэр-уотугар итинник маассабайдык кэрдии бобуллар. Ити тиэрмини туһаныы сөбө суох, уопсастыбаннаһы бутуйууга анаан туһаныллыбыт диэн ылыныахха сөп.
Санатар буоллахха, Алдан оройуонугар маһы соҕотуопкалааһын аукцион ыытыллыбытын түмүгэр барар. Ити барыта РФ Айылҕа ресурсатын туһаныыга уонна экология министиэристибэтин 474-с №-дээх бирикээһинэн (2016 сыл, балаҕан ыйын 13 күнэ) уонна РФ Ойуур Кодексатынан мэктиэлэнэллэр. Итиннэ эбэн этэр буоллахха, ойуур учаастагын арендаҕа ылыы, атыылаһыы дуогабара РФ Ойуур Кодексатынан эбэтэр суутунан эрэ көтүрүллэр кыахтаах. Аны туран, аччыгый уонна орто урбаанньыттар маһы соҕотуопкалааһыннара Ойуур Кодексатынан, атын федеральнай сокуонунан көмүскэллээх уонна урбаан үлэтин сокуон таһынан атахтааһыҥҥа эппиэтинэскэ тардыллыахха сөп.
Манна биири өйдүөххө наада. Өскөтүн этии, көннөрүү баар буоллаҕына, ону бастаан утаа ити боппуруостарынан быһаччы дьарыктанар боломуочуйалаах РФ Айылҕа ресурсатын туһаныыга уонна экологияҕа министиэристибэтигэр эбэтэр Ойуур хаһаайыстыбатын федеральнай агентствотыгар бэриллиэхтээх. Ойуур маһын кэрдиигэ туох эмит сыыһа-халты баар буоллаҕына, ити судаарыстыбаннай тэрилтэлэр суукка иск түһэрэр кыахтаахтар, онон суукка тиэрдиллэргэ аналлаах илии баттааһынын уопсастыбаннастан хомуйар наадата суох.
Аны туран, ураты харыстанар сири тэрийиигэ сөптөөх быһаарыныыны ылыныы «Об особо охраняемых природных территориях» диэн федеральнай сокуон чэрчитинэн, ирдэбилинэн ыытыллар, бу сокуон 1995 сыллаахха олунньу 15 күнүгэр ылыныллыбыта. Онон итини олоххо киллэрэргэ көҕүлүүр докумуону суругунан былаас тустаах тэрилтэлэригэр бэриллиэхтээх.
Түмүккэ этиэхпитин баҕарабыт. Саха сирин ытык-мааны олохтоохторо, ойуур маһын соҕотуопкалааһыҥҥа, кэрдиигэ сыһыаннаах сыыһа-халты сурахтарга-садьыктарга киирэн биэримэҥ. Барытын ыйааһын бэскитигэр ууран, ырытан-ыраҥалаан көрөн баран, сокуон хараҕынан көрөн үлэлиир урбаанньыттар аадырыстарыгар кэлтэйдии буруйдуур эрэ санаалары этэртэн туттунаргытыгар сүбэлиибит. Этиилээх, көннөрүүлээх буоллаххытына, ону быһаарарга аналлаах боломуочуйалаах уорганнары кытта быһаччы үлэлииргитигэр ыҥырабыт.

СӨ Экологиятын министиэристибэтин пресс-сулууспата

+1
0
+1
0
+1
0
+1
0
+1
0
+1
0
+1
0