Экология министиэристибэтэ ньургуһун сибэккигэ аналлаах күрэс биллэрдэ
Сыл ахсын, муус устар 19 күнүгэр, Аан дойду үрдүнэн Ньургуһун Күнэ бэлиэтэнэр.
Тоҥ буору тобулан тахсар, сааскы бастакы сибэккини хоһуйбатах хоһоонньут, ырыаһыт суоҕа буолуо. Уһун кыһыннаах, томороон тымныылаах дойдуга олорор саха киһитигэр ньургуһун ураты күндү, кэрэ буолар.
СӨ Экологияҕа министиэристибэтэ “Бастакы сибэкки — ньургуһун” диэн куонкуруһугар 1-6 кылаас үөрэнээччилэрэ кытталлар. Күрэс ирдэбилинэн уруһуйдар ньургуһуну харыстыыр ыҥырыылаах, ис хоһоонноох буолуохтаахтар. Кыттар оҕо аата-суола, оскуолата, кылааһа, олорор сирэ толору ыйыллыахтаах уонна Экология министиэристибэтин @minecologia_yakutia инстаграм сирэйин аадырыһыгар ыытыахтаах.
Күрэс кыайыылааҕын анал дьүүллүүр хамыыһыйа ыам ыйын 18 күнүгэр быһаарыаҕа. Ону таһынан, элбэх сөбүлүүр бэлиэни (лайк) ылбыт уруһуй ааптарыгар анал бириис туттарыллыаҕа.
Сэргээбиттэр сиһилии министиэристибэ саайтыгар, инстаграм сирэйигэр киирэн билсиэхтэрин сөп.
Ньургуйаана Иванова, “Саха сирэ” хаһыат, edersaas.ru
Хаартыска интэриниэттэн