Айылҕа харыстабыла Сүрүн

Экология министиэристибэтэ айылҕаҕа тахсыы хааччахтаммытын туһунан сэрэтэр

Саха сирин Экологиятын министиэристибэтэ өрөспүүбүлүкэ үрдүнэн IV уонна V кылаастаах баһаар куттала олохтоммутунан айылҕаҕа тахсыы хааччаахтанарын туһунан санатар. Бу дьаһал ойуурга тырааныспарынан сырыыны эмиэ хааччахтыыр.

Хааччахтааһыны олохтуур бирикээскэ Экология миниистирэ Сахамин Афанасьев илии баттаата.

Бу хааччахтар тыаны харыстыыр, ууһатар, баһаары утары үлэлиир дьоҥҥо уонна тэрилтэлэргэ, ону таһынан бу тэрээһиннэри хонтуруоллуур уорганнарга тарҕаммат.

Олохтоммут хааччахтар сокуон иһинэн туһаныыга бэриллибит тыа учаастактарыгар үлэлиир дьоҥҥо, быыһыыр үлэлэри оҥоро сылдьар дьоҥҥо, көмүскүүр, профилактикалыыр үлэни оҥорор дьоҥҥо тарҕаммат.

Хааччах от ыйын 1-21 күннэригэр үлэлиир, балаһыанньаттан көрөн уһуон сөп.

Саха сирин үрдүнэн ойууру баһаартан быыһыырга аналлаах мониторинг үлэтэ күүһүрдэ. Лесничестволар баһаар тахсыбатын туһугар, уот үөскээһинин эрдэттэн булар сыалтан, ботурууллуур-рейдэлиир тэрээһиннэри быыстала суох ыыта тураллар.

Тыаҕа баһаар кутталын үөскэтиэн сөптөөх быһыы-майгы ыстараабынан накаастаныллар. Улахан хоромньуну таһаарбыт буруйу оҥорооччулар холуобунай эппиэтинскэ тардыллаллар, ыстараап төлүүллэр.

Бирикээс туһунан сиһилии манна ааҥыаххытын сөп.

«Саха сирэ» хаһыат, edersaas.ru

Хаартыска: sakha.gov.ru

0
1