Бүгүн Дьокуускайтан Өймөкөөн оройуонугар Экология миниистирэ Сахамин Афанасьев улууска ойуур баһаарын балаһыанньатын миэстэтигэр билсээри көтөн кэллэ. Миниистир улуус актыыбын, дьокутааттары, тэрилтэлэр уонна көмүс хостуур тэрилтэлэр салайааччыларын кытта көрүстэ.
Эбиэт кэнниттэн Төрүт нэһилиэгэр кэлэн, ойуур баһаара буола турар сирин үөрэттэ, уопсастыбаннаһы кытта көрүстэ. Муниципалитет дьаһалтатыгар буолбут улуустааҕы ыксаллаах быһыы-майгы хамыыһыйатын кытта бүгүҥҥү буола турар балаһыанньаны ырыттылар. Улууска көмүс сууйуутун саамай үгэнэ. Мунньахха көмүс хостуур тэрилтэлэр салайааччылара 50-тан тахса ЛЭП остуолбаларын уот сиэн, туһаттан тахсыбыттарын бэлиэтээтилэр уонна «Магаданэнерго»ПАО салалтата уон күн иһигэр остуолбалары чөлүгэр түһэрэргэ көрдөстүлэр.
Төрүт нэһилиэгэр улуус баһылыга Иннокентий Сивцев миниистир Сахамин Афанасьевы кытта баһаар буола турар сирин-уотун көрөн кэлээт, уопсастыбаннаһы кытта көрсөн, олохтоохтор кыһалҕаларын иһиттилэр.
— Нэһилиэк аттыгар буола турар баһаар сиринэн бара турар. Нэһилиэктэн 10-ча км тэйиччи эбит. Улуустааҕы ыксаллаах быһыы-майгы хамыыһыйата сөптөөх үлэни тэрийэн, нэһилиэккэ көмө ыытан, тустаах хонтуруол бара турар эбит. Ол эрээри тыал уларыйдаҕына, куттал үөскүөн сөп. Ол оннук түбэлтэни үөскэппэт инниттэн, эрдэттэн сэрэтэр үлэни тобуллубут. Көмүс хостуур тэрилтэлэртэн улахан кыамталаах тыраахтар көрдөөтүбүт. Биллэн турар, куһаҕан суоллаах-иистээх сиргэ тиэйэн аҕалыыта уустук буолуоҕа. Ол тыраахтар нэһилиэктэн баһаары тэйитэр балаһаны хаһан оҥоруоҕа. Улуус кииниттэн бөртөлүөтүнэн көтөн иһэн, «Нелькан-Дражнай» көмүс хостуур учаастак икки ардыгар баһаар буола турарын көрдүбүт, манна уонча остуолба сууллубут эбит. Бу биир улахан баһаар Төрүт нэһилиэгин аттыгар буола турар. Ыарахан кыамталаах көлө кэлиэр диэри олохтоохтор баһаары харабыллыахтарын наада, — диэн Экология миниистирэ Сахамин Афанасьев санаатын үллэһиннэ.
Төрүт нэһилиэгин олохтоохторо баһаартан ураты ситэриилээх былаас салайааччытын уонна улуус баһылыгын кытта нэһилиэккэ сибээс мөлтөҕүн, эмчит суоҕун, суолу оҥорууну, тыатааҕы мэнээгин, Элги үрэх уута киртийиитин тула боппуруостары ырыттылар. Улуус баһылыга улууска буола турар балаһыанньаны билиһиннэрэн туран, Төрүт нэһилиэгин кыһалҕалаах боппуруостара хонтуруолга туралларын, сорох өттө быһаарыллан эрэллэрин бэлиэтээтэ.
Елена ПОТОЦКАЯ, «Саха сирэ» хаһыат, edersaas .ru
Хаартыскаҕа ааптар түһэриитэ.