2032 сылга Сахабыт сиригэр бэлиэ кэрдиис кэм буолара күүтүллэр, аны 14 сылынан өрөспүүбүлүкэ Арассыыйа састаабыгар киирбитэ 400 сылын көрсүөхпүт. Итиниэхэ бэлэмнэнии үлэтэ билиҥҥэттэн ыытылла турар. Төрөөбүт дойдубут социальнай-экэнэмиичэскэй сайдыытыгар сүрүн тосхоллор оҥоһулуннулар.
edersaas.ru
Ол туһунан СӨ экэниэмикэтин миниистирэ Майя Данилова өрөспүүбүлүкэҕэ экэнэмиичэскэй сулууспа тэриллибитэ 95 сыллаах үбүлүөйдээх коллегиятыгар сэтинньи 12 күнүгэр иһитиннэрдэ.
Кэлэр сылтан Саха сирэ Уһук Илин сайдыытын национальнай бырагырааматыгар кыттыһыахтаах. Экэнэмиичэскэй сайдыы тулалыыр эйгэбитин, айылҕабытын киртиппэтин, ону тэҥэ, социальнай кыһалҕаны быһаарарын туһугар экэнэмиистэр өркөн өйдөрүн сытыылыыллар.
«Кэлэр сылларга үлүскэн научнай-тиэхиньиичэскэй сайдыы бүгүҥҥү олохпут отуорун төрдүттэн уларытыа. Урбаан элбээн-тэнийэн, судаарыстыба национальнай экэниэмикэҕэ өлүүтэ биллэрдик кыччыа, ырыынакка атыылаһааччы, килийиэн туһугар күрэстэһии күүһүрүө. Сүрүн сыалбыт нэһилиэнньэ дьадаҥытык олорорун икки төгүл аҕыйатыы, олох уйгутун тупсарыы. Үлэ көрдөрүүтүнэн, оҥорон таһаарыынан ыаллаһа сытар Чуумпу акыйаан судаарыстыбаларыгар тэҥнэһэргэ дьулуһуохтаахпыт. 2032 сылга өрөспүүбүлүкэ киһи хапытаалын күрэстэһиитинэн аан дойдуга инники күөҥҥэ тахсыахтаах», — диэн эттэ миниистир Майя Данилова.
Эрэгийиэн бырабыыталыстыбатын бүгүҥҥү соруга – тырааныспар ситимин сайыннарарга үбү-харчыны булуу. Оччотугар сүрүн инфраструктурнай бырайыактар олоххо киирэн, Өлүөнэ өрүһү туоруур муоста уонна Бүлүү федеральнай суола оҥоһуллан, Дьокуускай нөҥүө Илин Сибиир куораттарын айан суолунан ситимниэ, олохтоох экэниэмикэ сайдарыгар дьоһун хардыы буолуо этэ.
2022 сылга бөдөҥ индустриальнай сырьевой бырайыактар үлэлэрин саҕалыахтара: Ленскэйдээҕи инфраструктурнай ситимҥэ Дьокуускайдааҕы гааһы хостуур эбийиэк, Томпоҕо хайа бырамыысыланнаһа, бырамыысыланнаска олохтоох каадырдары бэлэмниир арктическай бырайыак уо.д.а.
Ону таһынан, нэһилиэнньэ хамнаһын улаатыннарарга сиртэн хостонор баайтан ураты экэниэмикэ атын салааларын күүскэ сайыннарыахтара, онно 10 тыһ. тахса саҥа үлэ миэстэтэ тэриллиэҕэ.
Марианна Тыртыкова, «Саха сирэ», edersaas.ru