Арассыыйа, өрөспүүбүлүкэ үгүс урбаанньыттара, улуустар эмиэ табаардарын Кытайтан аҕалан атыылыыллар. Коронавирустан сылтаан, кыраныысса сабыллан, табаар эргиирэ тохтоон хааллаҕына, биһиэхэ хайдах дьайыан сөбүй?
Амматтан Дина Бахсырова: “Бэйэм урукку өттүгэр сүүрбэччэ сыл медицинаҕа үлэлээбит буоламмын, бу ыарыы вируһа салгынынан тарҕанарын, вируһу илдьэ сылдьааччы уонна тарҕатааччы киһи буоларын өйдүүбүн. Онон дьон ыалдьыбыта намтыар диэри ыарыы тарҕаммыт куораттарыгар карантин олохтоноро сөптөөх. Судаарыстыбаннай кыраныыссаларга күүстээх медицинскэй көрүүлэри (досмотр) олохтоотоххо, киирии-тахсыы тохтоомуон да сөп.
Кытай кыраныыссатын карантиҥҥа, ол эбэтэр 20-30 үлэ күнүгэр сабан кэбистэххэ, судаарыстыба экэниэмикэтэ улаханнык эмсэҕэлиир кутталлаах. Мин билигин бэйэм урбааҥҥа үлэлиир, Кытай оҥорон таһаарар фабрикаларын, интернет маҕаһыыннарын кытта быһа үлэлэһэр киһи санаам итинник», — диэн этэр.
Биллэрин курдук, коронавирус ас-таҥас, табаар нөҥүө бэриллибэт, ыалдьыбыт киһиттэн салгын нөҥүө тарҕанар.
Марианна Тыртыкова, «Саха сирэ», edersaas.ru