Ыраах Дьааҥы улууһун биир сүрүн соҕотуопсуга, «Тымныы Полюһа» ТХПК, тыа хаһаайыстыбатын үлэтин-хамнаһын хас да көрүҥүн тэрийэн олорор.
Кэпэрэтиип аҕыс нэһилиэк хаһаайыстыбаларыттан үүт тутан, үрүҥ ас уонтан тахса көрүҥүн астыыр, эккэ эмиэ үлэлиир. Күннээҕи үлэ-хамнас туһунан кэпэрэтиип бырабылыанньатын бэрэссэдээтэлэ Екатерина Портнягина маннык кэпсиир:
– Бородууксуйаны оҥоруу тиһигин быспат, астыыр кэмбинээт кыамтатын толору туһанар туһуттан, «Алгыс» кэпэрэтииби тэринэн, ынах сүөһүнү иитэр буолбуппут сэттэ сыл буолла. Күн бүгүн улаханныын-кыралыын 200-тэн тахса сүөһүлээхпит. Пиэрмэбит кыстыга Дьааҥы куоракка, сайылыга Остуолба нэһилиэгин Ыыстаах диэн учаастагар баар.
Ыыстаах үчүгэй мэччирэҥнээҕин таһынан, улуус кииниттэн, Баатаҕай бөһүөлэгиттэн, чугас буолан, бородууксуйаны илдьэргэ табыгастаах. Ол иһин кыстыкпытыттан хас да көс ыраах, сис хайа уҥуор турар учаастакка сайылыктанабыт. Бэйэбит ынахтарбытыгар эбии нэһилиэнньэттэн ынах хомуйан ыыбыт, онон күн аайы биир туоннаттан тахса үүтү астаан-үөллээн, улуус киинин уонна чугастааҕы нэһилиэктэрбитин үрүҥ ас арааһынан хааччыйа олоробут.
Раиса Сибирякова, «Саха сирэ», edersaas.ru