Үлэ Дьоруойа Екатерина Новгородованы 90 сааһынан чиэстээтилэр

Муус устар 13 күнүгэр Хаптаҕайдааҕы култуура дьиэтигэр мустубуттар икки ытык кырдьаҕас – Үлэ Дьоруойа, Арассыыйа үтүөлээх агронома, Саха Өрөспүүбүлүкэтин, Чурапчы уонна Мэҥэ Хаҥалас улуустарын Бочуоттаах олохтоохторо Екатерина Иннокентьевна итиэннэ кини олоҕун аргыһа, сэрии, үлэ бэтэрээнэ, «Ытык аҕа» бэлиэ хаһаайына Николай Семенович Назаров саалаҕа киириилэрин сүһүөхтэрин үрдүгэр туран, уруйдаан көрүстүлэр.

Ил Дархан уонна өрөспүүбүлүкэ Бырабыыталыстыбатын аатыттан Екатерина Иннокентьевнаны 90 сааһынан вице-премьер Денис Белозеров, Ил Түмэн тыа сиригэр уонна аграрнай бэлиитикэҕэ кэмитиэтин бэрэссэдээтэлэ Андрей Находкин, тыа хаһаайыстыбатын миниистирэ Александр Атласов, Мэҥэ Хаҥалас улууһун баһылыга Николай Старостин, өрөспүүбүлүкэ кырдьаҕастарын Ытык Сүбэтин бэрэссэдээтэлэ Люлия Григорьева уо.д.а. эҕэрдэлээтилэр.

Бу дьоро киэһэҕэ Екатерина Иннокентьевнаҕа анаан элбэх үтүө тыл, алгыс этилиннэ, “Саха” НБИХ архыыбыттан Хаптаҕай оҕуруотчуттарын биригэдьиирэ Екатерина Новгородова туһунан документальнай киинэ көрдөрүлүннэ, уус-ууран самодеятельность кэнсиэрдэ буолла.

Екатерина Захарова, «Саха сирэ» хаһыат, edersaas.ru