Бу күннэргэ Тымныы Полюһун — Өймөкөөн нэһилиэгин дьахталлара сыстыганнаах дьаҥтан харыстанан, дьиэлэригэр олорор кэмнэригэр араас интэриэһинэй дьыаланан дьарыктаналлар.
edersaas.ru
Ол курдук, оскуола интэринээтин үлэһитэ үс оҕо ийэтэ, биир сиэн эбээтэ, иллэҥ кэмигэр саха национальнай таҥаһын сакааһынан тигэр иистэнньэҥ Елена Репина 100 мааска тиктэ, атыылаата уонна нэһилиэк ытык кырдьаҕастарыгар босхо түҥэттэ.
Үс оҕо ийэтэ, асчыт идэлээх кулууп үлэһитэ Саргылана Быковская дьиэтигэр олорон, оҕолоругар, дьонугар күн аайы ас арааһын астаан күндүлүүр.
Иитээччи, икки оҕо ийэтэ иллэҥ кэмигэр иистэнэрин сөбүлүүр Нелли Уваровская олбох тарааһын тиктэ. Үлэтигэр таҕыстаҕына, кини бу үлэлэрин уһуйааныгар оҕону иитэр үлэтигэр туттуоҕа.
Нэһилиэк дьаһалтатын исписэлииһэ, үс оҕо ийэтэ Анна Малых — торт оҥорор маастар.
Билигин оҕотун көрөн олорор эдэр ийэҕэ дьон дьиэлэригэр олорор буолан, торт арааһын сакаастыыллар.
«Кэнчээри» уһуйаан үлэһитэ, икки оҕо ийэтэ (оҕолоро улахан дьон) Екатерина Заболоцкая иннэ анньар, харысхал, олбох тиктэ.
Учуутал, үс оҕо ийэтэ, түөрт сиэн эбээтэ Мария Иванова оҕуруонан илин кэбиһэр киэргэлин тиктэ. Кини салайар Муода тыйаатыра — улахан тэрээһин «мааны киэргэлэ».
Иитээччи Марианна Тырылгина дьиэҕэ олорор кэмин туһанан, сибэккилэрин бэрийдэ.
Кини дьиэтэ кыһыҥҥы оранжереяны санатар. 60 кыраадыс тымныылаах Тымныы полюһунан аатырбыт нэһилиэк олохтооҕо сибэкки 20 көрүҥүн олордор.
Дьиэҕэ олорор кэмнэригэр ыал аайы бэрэски — саамай маанылаах аһынан буолла.
Сылаас үүттээх чэйгэ минньигэс рулеты астаан, ийэлэр дьиэлээхтэрин үөрдэллэр.
Оттон куорат эрэстэрээнин маанылаах аһа — суши ыал аайы астанар буолан, бу күннэргэ «күннээтэ».
… Ити курдук, уустук кэмҥэ ыал ийэлэрэ, эбээлэрэ чугас дьонноругар сылаас дьиэ холумтанын бэлэхтииллэр.
Елена ПОТОЦКАЯ, «Саха сирэ»хаһыат, edersaas.ru