Уопсастыба

«Эйэ» кэмитиэтэ наадатын ыйдылар

Дьокуускайга Саха сирин дьахталларын ХV сийиэһэ ыытылла турар.


Дьааҥы улууһуттан сийиэскэ кытта кэлбит Баатаҕай нэһилиэгин дьаһалтатын иһинэн тэрийэр уонна правовой боппуруостары сүрүннүүр салаа салайааччытын солбуйааччы Айталина Дмитриевна Шадриналыын кэпсэттим.
—Сийиэс бастакы күнэ олус таһаарыылаахтык ааһан эрэр. Мин сарсыарда өттүгэр “Народная дипломатия” диэн стратегическэй сессия үлэтигэр кыттыбытым. Билигин тыҥаан турар бэлитиичэскэй боппуруостар эмиэ таарылыннылар. Ол курдук өрөспүүбүлүкэбитигэр «Эйэ» кэмитиэтэ тэриллиэн наада диэн этии киирдэ. «Эйэ кэмитиэтин” тэрийии туһунан этиини Оксана Викторовна Новгородова, Сунтаар улууһуттан кэлбит дэлэгээт киллэрдэ. Мин саныахпар, маннык уустук кэмҥэ түмсүүлээх буолар оруннаах. Ону сэргэ, Арктика оройуонун дьиэ кэргэттэригэр тус сыаллаах судаарыстыбаннай бырагыраамалар үлэлииллэрин туһугар үөрэҕирии, доруобуйа, оҕо сынньалаҥын тэрийии, онтон да атын социальнай боппуруостар көтөҕүлүннүлэр. Саха сирин дьахталларын түмэр сийиэскэ дэлэгээт буолан кэлбиппиттэн наһаа үөрдүм. Наһаа үчүгэйдик санаа үллэстэн, атын дэлэгээттэр, спикердэр санааларын истэн киһи уопут атастаһар, сэргэхсийэр.
Биһиги 2020 сыллаахха «По зову сердца Матери солдата” диэн социальнай бырайыак оҥорбуппут. Онно биир дойдулаахпыт лейтенант Христофор Слепцов- Эллэ Литваҕа Кибартай куоракка көмүллэ сытар сиригэр барар соруктаах этибит. Онтубут кыраныысса сабыллан, пандемия буолан кыайан барбатахпыт. Маннык социальнай бырайыактар дьону түмэллэр, үлэҕэ-хамнаска сүрүннүүллэр.
Түгэнинэн туһанан тэрийээччилэргэ улахан махталбын тиэрдэбин.

Ульяна ЗАХАРОВА.

1
0
Telegram @edersaas20