«Дьон олороругар куорат табыгастаах эйгэтин тэрийии хас биирдии киһиттэн саҕаланар — кини олорор дьиэтиттэн, тиэргэниттэн, оройуонуттан, куоратыттан, дойдутуттан. Дьиэбитин эрэ буолбакка, уопсастыбаннай сирдэри оҥорон, дьон сөбүлээн мустар, салгын сиир, сынньанар сирдэрин тэрийдэхпитинэ, итиниэхэ ыччаты, баҕалаах дьону сыһыардахпытына, улахан хамсааһын тахсыан сөп», — диэн эттэ бүгүҥҥү форум аһыллыытыгар РФ Тутууга уонна ОДьКХ миниистирин солбуйааччы Максим Егоров.
Сэтинньи 27-28 күннэригэр Дьокуускай куоракка «Өйдөөх куорат – олорорго табыгастаах эйгэ» диэн Уһук Илин таһымыгар икки күннээх форум үлэтин саҕалаата. Биллэрин курдук, эрэгийиэн сайдыытыгар дойду бэрисидьиэнэ Владимир Путин тус болҕомтотун уурар.
«Арассыыйа – мин историям» историческай пааркаҕа Уһук Илин куораттарын, федеральнай былаас бэрэстэбиитэллэрэ кыра нэһилиэнньэлээх куораттары цифровизациялыырга, дьон олороругар тупсаҕай оҥорорго уопуттарын, санааларын үллэһиннилэр. Владивосток, Южно-Сахалинск, Москва о.д.а. куораттарга элбэх кыбартыыралаах дьиэлэр олбуордарын, пааркалары, муора, өрүс кытыытыгар дьон дьаарбайар сирин хайдах оҥорбуттарын, тугунан киэргэппиттэрин кэпсээтилэр.
Хааһынаҕа үп-харчы кырыымчык түгэнигэр, уопсастыбаннай сирдэри оҥорорго хантан үбүлээһин, үлэһит илии булуохха сөбүн туһунан сырдаттылар. Саҥа тутуллубут сквер, былаһаакка, паарка кэлин кураанахсыйан турбатын ситиһэргэ туох-ханнык тэрээһин ыытан, харчы киллэриэххэ, урбаанньыттары үлэлэтиэххэ сөбүн иһитиннэрдилэр.
Табыгастаах куорат эйгэтин тэрийэргэ биһиги куораппыт дойду үрдүнэн инники күөҥҥэ иһэр. Ону таһынан, Дьокуускай – «Өйдөөх куорат» кэнсиэпсийэтин олоххо киллэрэргэ Уһук Илин – пилотнай муниципалитет быһыытынан биллэр.
«Өйдөөх куорат» бастакы хараҥаччылара – оптуобус күүтэргэ сылаас тохтобуллар, тырааныспар хаһан кэлэрин биллэрэр сервис, ОДьКХ эйгэтигэр ким төһө ууну-уоту, гааһы туттубутун сыыппараҕа көһөрүү о.д.а.
Дьокуускайга буола турар форум РФ Тутууга министиэристибэтэ көҕүлээһининэн ыытыллар. СӨ сүрүн архитектора Ирина Алексеева этэринэн, федеральнай биэдэмистибэ Саха сиригэр болҕомтотун уурбута – өрөспүүбүлүкэ табыгастаах куорат эйгэтин тэрийэргэ иннин диэки киэҥник хардыылаан иһэрин көрдөрөр. «Тымныы кырыа кыһыннаах ирбэт тоҥ үрдүгэр дьиэҕэ хаалла сыппакка, дьон сөбүлээн тоҕуоруйар, чэбдигирэр сирин тэрийэргэ биһиэхэ улахан бырайыактар бааллар, ону олоххо киллэриэххэ наада», — диэтэ кини.
Марианна Тыртыкова, «Саха сирэ», edersaas.ru