Өймөкөөн улууһун Хара Тумул нэһилиэгэр Улуу Кыайыы 75 сылыгар анаан Өймөкөөн булчуттарыгар уонна сэрии ыар сылларыгар оройуон дьонун хоргуйууттан быыһаабыт аар айылҕа маанылаах оҕотугар куобахха анаан Махтал мэҥэ бэлиэтин үөрүүлээх арыллыыта буолла.
Пааматынньык ааптара Семен Сивцев оҕо сылдьан эбэтэ Аҕа дойду Улуу сэриитин туһунан кэпсиирин остуоруйа курдук истэрэ. «Эбэм оҕо сааһым өйдөбүлүнэн буолбут булчуттар куобаҕынан аһатан биһигини тыыннаах хаалларбыттара диэн кэпсиирэ. Ол онно мин, саҥа борбуйбун көтөҕөн эрэр киһи «улааттахпына хайаан даҕаны булчут уонна куобах пааматынньыга оҥоруом» диэн санааҕа ылларбытым. Ол баҕа санаабын быйыл олус бэлиэ сылга олоххо киллэрдим. Ол курдук, Өймөкөөн улууһа 100, уонна Улуу Кыайыы 75 сылларыгар анаан пааматынньык оҥордум», — диэн ааптар кэпсиир.
Мэҥэ бэлиэ пааматынньык арыллыытыгар улуус баһылыга Иннокентий Сивцев: «Бу маннык өйдөбүнньүк бэлиэ пааматынньыктар Улуу Кыайыыны уһансыбыт дьоммутун үйэтитэн, үүнэр көлүөнэни төрөөбүт дойдуларын устуоруйатын билэ, үөрэтэ сылдьалларыгар көҕүлүүр», — диэн бэлиэтээтэ.
Семен Сивцев өссө да араас бырайыактааҕын туһунан санаатын үллэһиннэ. Бу пааматынньык тутулларыгар Семён Сивцев аймахтара бука бары харчынан кыттыһан, уоллара ыра санаа оҥосто сылдьыбыт баҕа санаатын олоххо киллэрэригэр төһүү күүс буоллулар.
Төрөөбүт дойдуга бэриниилээх буолуу сылыгар Семен Сивцев биир дойдулаахтарыгар бэртээхэй үйэлээх бэлэҕи оҥордо.
Елена ПОТОЦКАЯ, «Саха сирэ» хаһыат, edersaas.ru