Дьокуускайга биир саалалаах киинэ тыйаатырдарыттан саамай улаханнара (300-тэн тахса миэстэлээх)“Лена” киинэ тыйаатыра көрөөччүнү кытта үлэтин сайыннаран иһэр. Ол курдук, бу балаҕан ыйын 27 күнүгэр манна ХИФУ, Тыа хаһаайыстыбатын академиятын, Дьокуускайдааҕы атыы-эргиэн кэллиэһин уонна Экономико-правовой институт бастакы куурустарын устудьуоннарын киинэ көрөөччүгэ “сүрэхтээтилэр”.
Устудьуон күнүгэр “Ленаҕа” ыҥырыллан кэлбит устудьуоннар аны мантал ыла, дисконтнай карталаах буоланнар, ханнык баҕарар күҥҥэ киинэҕэ чэпчэтиилээх билиэт ылар кыахтаннылар. Бу тэрээһиҥҥэ кэлбэтэх устудьуоннар оптуорунньук эрэ күҥҥэ “Лена” киинэ тыйаатырыгар чэпчэтиилээх билиэти ылаллар.
Бу көрсүһүү кэмигэр ыччаттар, тэрийээччилэр ыытар куонкурустарыгар, араас оонньууларыгар, викториналарыгар көхтөөхтүк кыттаннар, киинэпрокат үлэһиттэриттэн уонна куорат фирменнэй маҕаһыыннарыттан араас бэлэх-туһах туттулар. Оннооҕор сорохтор пицца, попкорн сүүйдүлэр.
“Лена” киинэ тыйаатырын дириэктэрэ Алексей Егоров, бастакы куурус устудьуоннарын киинэ көрөөччүгэ “сүрэхтиир” күн аны, үтүө үгэс быһыытынан, сыллата ыытыллыаҕа, диэтэ.
Оҕолорго, көр-күлүү аргыстаахтык уонна олус дьоһуннаахтык “Киинэ көрөөччү андаҕара” сиэр-туом ыытылынна. Аны бу күнтэн ыла манна мустубут ыччаттар ыйга 3-тэн итэҕэһэ суохтук киинэҕэ сылдьыахпыт, диэн андаҕайдылар.
Киинэ да арааһа буолаары турар эбит. Холобур, олунньуга тахсыахтаах “Агент Мамбо” диэн усулуобунай ааттаах киинэни презентациялаатылар (режиссер-сценарист А.Амбросьев-Аччыгый). Манна Кеша диэн, этэргэ дылы, “хайдах эрэ” полицейскай араас мүччүргэннээх сырыыларын туһунан кэпсэнэр эбит. Сүрүн оруолга — Иннокентий Хобуев. Кэмиэдьийэ жанра диэххэ сөп, биллэр-көстөр комедийнай артыыстар уонна КВН-щиктар кыттыыны ылаллар.
Итиэннэ, кэлэр ыйдар репертуардарыттан билиһиннэрдилэр.
Виктор Ли-Фу, сорохтор кинини фотограбынан билэр эбит буоллахтарына, аны билигин кини режиссер. Хас да киинэлээх. Күннэй “Чээкэ” клибын билэҕит, манна олоҕуран, сайыннаран, Виктор саҥа киинэ устубут. Ый курдугунан экраҥҥа тахсыахтаах диэтилэр. Күннэй оонньуур. Уопсайынан, бастакы мюзикл-киинэ диэххэ сөп буолуо. Эдэр талааннары көрүөхпүт. Интэриэһинэй.
Оттон, устудьуоннары кытта көрсүһүүгэ Дьокуускай куорат Культураҕа управлениетыттан кыттыыны ылбыт Василина Кривошапкина, соторутааҕыта Дьокуускайга кэлэ сылдьыбыт киинэ режиссера, продюсер Тимур Бекмамбетов, «Зима начинается с Якутии» бэстибээл туһунан истээт да, «Елки последние» киинэтин премьератын Дьокуускайтан саҕаланыа диэн быһаарбытын эттэ. Бу сонуну оҕолор олус үөрэ көрүстүлэр.
Саҥа Дьыллааҕа хит буолбут «Елки последние» киинэ ааптардара бэйэлэрэ Дьокуускайга бастакынан буолар премьераҕа кэлиэхтээхтэр. Онон, үгэс быһыытынан, «Зима начинается с Якутии» бэстибээл кэмигэр ыытыллар муус скульптуралар куонкурустарын тиэмэтэ эмиэ эрдэттэн биллэр. Скульптуралары 202-с микрооройуон Муус куоратыгар итиэннэ “Лена” киинэ тыйаатырын аттыгар көрүөххэ сөп буолуоҕа.
“Елки” сиэрийэлэрэ бары социальнай миссиялаахтар. Онон, уолаттар-кыргыттар, дьоҥҥутун – төрөппүттэргитин, эбээлэргитин, эһээлэргитин, эдьиийдэргитин-убайдаргытын, ыаллыы олорор аҕа саастаах доҕотторгутун бу киинэҕэ хайаан даҕаны илдьэ кэлиҥ, диэн ыҥыраллар тэрийээччилэр.
Татьяна Маркова, «Саха сирэ», edersaas.ru