Сэтинньи, Таҥараианство итэҕэлинэн, Дьылҕа Хаан уонна Байанай ыйа саҕаламмытынан эҕэрдэлиибин!
Сылы, ыйы Айыылар ааттарынан ааттааһыны Тэристээх киллэрбиттэрэ. Сахаларга урут оннук үгэс суох этэ.
Ол гынан баран, ити Тэрис киллэрбит систиэмэтэ биир сиргэ кэлэн кэһиллэр. Ити систиэмэнэн бары ыйы Айыылар салайар эбит буоллахтарына, ала-чуо сэтинньи ыйы сирдээҕи иччи Байанай салайар буолан хаалар.
Таҥараианство Сирдээҕи иччилэри Айыылар көмөлөһөөччүлэрэ диир. Ол курдук, кинилэр, Үөһээҥҥи Айыылар сорудахтарынан, Орто дойдуга сыллары уонна сйдары дьаһайсаллар. Алтынньыны Хотой Айыы уонна Сирдээҕи Айыы — Тымныы Иччитэ Эһээ Дьыл оҕуһа салайбыт эбит буоллахтарына, сэтинньини Дьылҕа Хаан уонна Сирдээҕи Баай хара тыа Иччитэ Байанай кырдьаҕас салайар.
Оттон 2020 сылы Билгэ Хаан уонна Сирдээҕи Айыы — Суол иччитэ Моһол Тойон салайар.
Кинилэр эһиил 2021 сыл ыам ыйыгар тиийэн сылы салайыы муоһатын Таҥха Хааҥҥа уонна Кыдай Бахсыга туттарыахтара.
Онон үүммүт Дьылҕа Хаан уонна Байанай салайар ыйынан эҕэрдэлиибин!
Чэгиэн-чиргэл, төрдүс Аҕа куккут арыллан ситиһиилээх уонна дьоллоох буолуҥ!
«Саха сирэ» хаһыакка, edersaas.ru саайтка анаан
Гаврил Угаров-Эһээ Дьыл.
Хаартыска — nu.s-vfu.ru