Учуутал күнүнэн СӨ Үөрэҕин уонна наукатын миниистирэ Владимир Егоров эҕэрдэлиир

Убаастабыллаах биир идэлээхтэрим, учууталлар, педагогическай үлэ бэтэрээннэрэ!

СӨ Үөрэҕин уонна наукатын министиэристибэтин итиэннэ тус бэйэм ааппыттан идэлээх бырааһынньыккытынан – Учуутал күнүнэн эҕэрдэлиибин!

Алтынньы 5 күнүгэр хас биирдиибит олоҕор суолталаах дьону чиэстиибит. Бары оҕо буола сылдьыбыппыт, хас биирдиибитигэр учуутал, настаабынньык сырдык уобараһа өйдөнөн хаалбыта. Кинилэри үйэбит тухары махталынан ахтабыт.

Учуутал идэтин суолтата уонна анала сылтан-сыл үрдээн, кэҥээн иһэр. Бүгүҥҥү күҥҥэ учуутал диэн үөрэнээччигэ билиини иҥэрэр көннөрү исписэлиис эрэ буолбатах. Аныгы учуутал – балысханнык сайдар олоххо оҕо бэйэтин миэстэтин буларыгар сирдиир  доҕор, настаабынньык. Кини идэтин уһулуччу баһылыырын ааһан, кэм туруорар ирдэбилин суолтатын билиэхтээх. Биһиги сорукпут – атыттары кытта күөн күрэстэһэр кыахтаах, киэҥ толкуйдаах, быһаарыыны ылынар уонна эппиэтинэстээх ыччаты  иитэн таһаарыы. Төрөөбүт дойдубут дьиҥнээх гражданнара үүнэн-сайдан тахсалларыгар көмөлөһүөхтээхпит.

Үрдүк квалификациялаах педагогическай каадырдары сыһыарыыга, өйүүргэ, материальнай-тиэхиньиичэскэй уонна үөрэх мэтэдиичэскэй базатын саҥардыыга дойду, өрөспүүбүлүкэ үрдүнэн ситимнээх үлэ барар. Дьиэнэн-уотунан хааччыйыыга, хамнаһы, учуутал социальнай статуһун үрдэтэргэ болҕомто ууруллар. Күн бүгүн Ил Дархан Айсен Николаев сорудаҕынан Арктика улуустарыгар үлэлии барар эдэр педагогтары өйүүр миэрэ толкуйданыллар. РФ бэрэсидьиэнэ Владимир Путин “Тыа сирин учуутала” (“Сельский учитель”) бырагырааманан Уһук Илин уокурук педагогтарыгар көрүллэр биир кэмнээх төлөбүрү икки бүк үрдэтэр туһунан дойду бырабыыталыстыбатыгар сорудах биэрбитэ. Бу курдук өйөбүллэр ыраах сытар улуустарга каадыр тиийбэт балаһыанньатын тупсараллар, исписэлииһи көҕүлүүллэр.

Убаастабыллаах учууталлар! Эһиги өрүү махтал истиҥ тылларын истэргит сөптөөх. Бүтүн Арассыыйа, норуоттар икки ардыларынааҕы таһымнаах ситиһиилэргитинэн киэн туттабыт. Эһиги баар буолаҥҥыт оҕолорбут аан дойдуга бастыҥынан ааттаналлар. Өрөспүүбүлүкэ бары үөрэнээччилэрин хаачыстыбалаах үөрэҕинэн хааччыйыыга, үүнэр көлүөнэни эт-хаан, өй-санаа, билии уонна духуобунай өттүнэн сайыннарарга усулуобуйа олохтуурга бары бииргэ хардыылыыбыт. Бу курдук тэтимнээхтик атыллаан, күүспүтүн, кыахпытын түмэн, өрөспүүбүлүкэ салалтата биһиги иннибитигэр туруорбут — үөрэх хаачыстыбатынан 15 бастыҥ эрэгийиэн кэккэтигэр киирэр соругун ситиһэрбитигэр бигэтик эрэнэбин.

Улахан махталбын педагогическай үлэ бэтэрээннэригэр тиэрдэбин. Эһиги баай уопуккут эдэр педагогтарга сүрүн тирэҕинэн буолар. Муудараскытын, ыйыыгытын-кэрдиигитин, сүбэҕитин-амаҕытын сыаналыыбыт.

Күндү биир идэлээхтэрим! Айымньылаах, таһаарыылаах өрө көтөҕүллүүгүт, идэҕитигэр бэриниилээх буолуугут кыыма, оҕоҕо истиҥ тапталгыт хаһан даҕаны уостубатын.

Кытаанах доруобуйаны, үрдүк үктэллэри, саҥа идиэйэлэри уонна бырайыактары баҕарабын. Дьолу-соргуну, тапталы уонна этэҥҥэ буолууну!

Убаастабылы кытта, СӨ үөрэҕин уонна наукатын миниистирэ Владимир Егоров.