Саха бөҕөһө Германия быйылгы бундеслигатыгар кыайыытын ахсаанын уоҥҥа тириэртэ
Саха тустууга оскуолатын иитиллээччитэ Владимир Егоров Германия кулууптарын чөмпүйэнээтигэр 57 уонна 61 киилэҕэ диэри ыйааһыннарга үһүс сылын ситиһиилэхтик тустар. edersaas.ru
Арассыыйа спордун маастара быйылгы бундеслигаҕа балаҕан ыйыттан саҕалаан уон көрсүһүүгэ кытынна уонна барыларыгар хотуулаах тахсыталаата, онтон алтатын ыраас кыайыынан түмүктээтэ.
Аҕыйах хонуктааҕыта Владимир тустар «SV Wacker Burghausen» кулууба «VfL Neckargartach» бөҕөстөрүгэр тиийэн 10:12 ахсаанынан хоттордо. Онно Владимир 57 киилэҕэ диэри ыйааһыҥҥа утарылаһааччытын, Грузияттан сылдьар легионер Леван Метревелины 3:1 ахсаанынан баһыйа тутта. «VfL Neckargartach» хамаанданы кытта иккис көрсүһүү ахсынньы 23-гэр буолар.
Амма ыччата быйыл Македония аатыттан аан дойду, Европа чөмпүйэнээттэригэр кытынна. Германия, Македония чөмпүйэнээттэрин кыайыылааҕынан буолла, ону тэҥэ кэккэ норуоттар икки ардыларынааҕы турнирдарга миэстэлэстэ.
Роман Попов, “Саха сирэ” хаһыат, edersaas.ru