Бүгүҥҥүттэн, от ыйын 24-тэн, Сараевоҕа (Босния уонна Герцеговина) обургу уолаттар ортолоругар тустууга Европаҕа бастыыр иһин күрэхтэһии ыытыллар.
Бастакы күн түһүлгэҕэ 42, 50, 58, 69 уонна 85 киилэҕэ диэри ыйааһыннаахтар тахсыахтара.
Саамай чэпчэки ыйааһыҥҥа Арассыыйа сүүмэрдэммит хамаандатыттан саха тустууга оскуолатын иитиллээччитэ Егор Вензель тустуоҕа. Кини бастакы эргииргэ Фуркан Уколюгу (Турция) кытта күөн көрсүөҕэ. Онно утарылаһааччытын хоттоҕуна, салгыы Георгий Чоладзе (Грузия) — Исмаил Мехмедов (Болгария) хапсыһыыларын кыайыылааҕын утары тахсыаҕа.
Бу ыйааһыҥҥа барыта уон бөҕөс континеҥҥа бастыыр иһин күрэхтэһии мэтээллэрин ыларга күүһүн холоһор. Тустууктар саҥа быраабыланан тустуохтара, онон ыйааһын аайы хапсыһыылар икки күн ыытыллыахтара.
Обургу уолаттар ортолоругар көҥүл тустууга Еропаҕа бастыыр иһин күрэхтэһии.
Арассыыйа сүүмэрдэммит хамаандатын састааба:
42 кг — Егор Вензель; 46 кг — Магомед Абдурахманов; 50 кг — Федор Балтуев; 54 кг — Александр Балтуев; 58 кг — Артыш Ооржак; 63 кг — Инал Кетия; 69 кг — Давид Чельдиев; 76 кг — Арсамаг Хостикоев; 85 кг — Алик Шебзухов; 100 кг — Исмаил-Бек Ныров.
Роман Попов, «Саха сирэ» хаһыат