Дьокуускай куорат баһылыгын экономикаҕа уонна үпкэ-харчыга урукку солбуйааччыта, эдэр саха киһитэ Егор Поповка бастакы холуобунай дьыала 2016 сыл күһүнүгэр тэриллибитэ. Ол кэнниттэн иккис дьыала тэриллибитэ. Оттон бэҕэһээ сонуну киэҥник тарҕатар ситимнэр иһитиннэрбиттэринэн, дьыалалартан биирдэстэрэ сабыллыбыт.
Туохха буруйдаммытай?
Егор Попов 2016 сыл алтынньы 28 күнүн киэһэтигэр хаайыллыбыта. Оччолорго СӨ Борокуратуурата иһитиннэрбитинэн, Дьокуускай куорат борокуратуурата СӨ ИДьМ-тын Экономическай буруйдары уонна коррупцияны утары охсуһар управлениетын кытта бииргэ бэрэбиэркэ ыыппыттар. Доруобуйаларынан хааччахтаах оҕолор үөрэниэхтээх 35-с №-дээх оскуолаларын тутуу тоҕо өр тардылларын быһаарар сыалтан.
Дьокуускай куорат борокуруорун РФ Холуобунай-прооцессуальнай кодексатын 37-с ыст. 2-с чааһын 2-с пуунугар олоҕурбут уурааҕынан, РФ Силиэстийэлиир кэмитиэтин Саха сиринээҕи управлениетын Дьокуускай куораттааҕы отдела алтынньы 26 күнүгэр холуобунай дьыала тэрийбитэ. РФ Холуобунай кодексатын 286-с ыст. 3-с чааһын “в” пуунунан”. Ол эбэтэр, дуоһунастаах үлэһит дуоһунаһын боломуочуйатын аһара баран, уопсастыба уонна судаарыстыба сокуонунан көмүскэнэр интэриэстэрин кэһиитин, ол түмүгэр ыарахан содулу оҥоруутун бэлиэтэ баарынан.
«Урукку чунуобунньук сокуоннайа суох дьайыыларынан “Дьокуускай куорат” муниципальнай тэриллиигэ 1 мөл. солк. кэриҥэ суумалаах хоромньу оҥоһуллубут, муниципальнай бас билииттэн оскуола тутуллуохтаах, кадастровай сыанатынан 32 мөл. солк. тахса. суумалаах сир сокуоннайа суохтук куоттарыллыбыт, итинэн доруобуйаларынан хааччахтаах оҕолор бырааптара кэһиллибит«, — диэн иһитиннэрбитэ борокуратуура.
Силиэстийэ уорганнара онно сабаҕалаабыттарынан, 2013 сыллаахха ол кэмҥэ Дьокуускай куорат баһылыгын солбуйааччы Егор Попов үлэһиттэригэр 35-с №-дээх оскуола дьиэтэ тутуллар сирин иэнин аччатар туһунан сокуоннайа суох дьаһал биэрбит. Сокуоннайа суохтук босхоломмут сир чааһынай тутуу тэрилтэтэ элбэх мэндиэмэннээх дьиэ тутарыгар анаммыт.
Итини таһынан, силиэстийэ дааннайынан, оскуола дьиэтин бырайыактыыр-сметалыыр докумуонун туох да сокуоннай төрүөтэ суох оҥоһуллубут корректировкатыгар бүддьүөттэн 1 мөл. солк. кэриҥэ суума ороскуоттаммыт.
Уорбаланааччы Попов Москва куоракка көтөөрү билиэт ылбыта силиэстийэ уорганнарыгар биллэн, кинини оперативниктар туппуттара.
2016 сыл алтынньы 28 күнүгэр Дьокуускай куорат федеральнай суута силиэдэбэтэл хадатаайыстыбатын өйөөн, уорбаланааччы икки ыйга 1 №-дээх Силиэстийэлиир изоляторга хаайыллыбыта.
Оччолорго Дьокуускай куорат баһылыга Айсен Николаев суруналыыстары кытта көрсүһүүгэ: «Силиэстийэ хаамыытын туһунан мин туох да диэн эппэппин, тоҕо диэтэр, ол силиэстийэ уорганнарын дьыалата. Киһини сууттана илигинэ, үчүгэй дуу биитэр куһаҕан дуу диэн этэр эмиэ сатаммат. Саас быраабы араҥаччылыыр уорганнартан иһитиннэрии киирээтин, Егор Попову сулууспатын эбээһинэһиттэн туоратар туһунан быһаарыы ылыммыппыт. Бэйэбит бэрэбиэркэ ыытар кэммитигэр кини бэйэтин баҕатынан үлэтиттэн уурайбыта», — диэн иһитиннэрбитэ.
Онтон 2016 сыл ахсынньытыгар Егор Поповка өссө иккис холуобунай дьыала тэриллибитэ. Силиэстийэ сабаҕалыырынан, Попов Дьокуускай куорат Билибин аатынан уулуссатыгар баар сири сокуоннайа суохтук ылбыт уонна ону хас да сыл буолан баран, 4 мөл. солк. атыылаабыт диэн этэ. Экс-чунуобунньук ол кэмҥэ МФЦ-га туттарбыт докумуоннарыгар «ситэ тутулла илик дьиэм сирэ мин ааппар оҥоһулла илик» диэн ыйан, сиргэ докумуоннары ылбыт. Ол эрэн, силиэстийэ быһаарбытынан, ол ситэ тутулла илик дьиэтэ атын сиргэ баар, Билибин уулуссатыгар буолбатах эбит.
Аны 2018 сыл тохсунньу ыйыгар Поповка үһүс холуобунай дьыала тэриллибитэ. Эмиэ РФ Холуобунай кодексатын 286-с ыст. 3-с чааһын “в” пуунунан”. Ол эбэтэр, дуоһунастаах үлэһит дуоһунаһын боломуочуйатын аһара баран, уопсастыба уонна судаарыстыба сокуонунан көмүскэнэр интэриэстэрин кэһиитин, ол түмүгэр ыарахан содулу оҥоруутун бэлиэтэ баарынан.
Силиэстийэ сабаҕалыырынан, Егор Попов 2013 сыл ыам ыйыгар киин куорат баһылыгын солбуйааччытынан үлэлиир кэмигэр Бүлүүлүүр суол 5-с км баар 52000 кв.м. кэриҥэ иэннээх сир учаастагын «Бэстээх» даача тутар кооперативка куортамҥа биэрэр туһунан дьаһалга илии баттаабыт.
Маныаха дьаһал тахсар кэмигэр ити сир учаастагын 7600 кв.м. иэнэ «Р-6» диэн рекреационнай зонаҕа – куорат ойуурун зонатыгар — киирсэр эбит. Кэлин ити сир хас да учаастактарга араарыллан, куорат ойуурун иэнэ аччыырыгар тиэрдибит. РФ Ойуурга кодексатын балаһыанньатынан, куорат ойуурдарыгар капитальнай тутуу эбийиэктэрин тутуу бобуллар.
Ити дьайыыларынан, «Дьокуускай куорат» уокуругар 19 мөл. солк. кэриҥэ суумалаах материальнай хоромньу оҥоһуллубут диэн.
Иккитэ сабылынна, үсүһэ силиэстийэлэнэр
Санатар буоллахха, 2017 сыл сэтинньи ыйыгар ити 35-с оскуола сиригэр сыһыаннаах холуобунай дьыалата сабыллыбыта. РФ Силиэстийэлиир кэмитиэтин Саха сиринээҕи управлениета Егор Попов дуоһунас боломуочуйатынан туһаммыт чахчыта силиэстийэ кэмигэр бигэргэммэтэ, онон, буруйу оҥоруу састааба суоҕунан сабылынна диэн иһитиннэрбитэ.
Иккис дьыалата — 2012 сыллаахха Билибин уулуссатыгар сири сокуоннайа суохтук ылыыга буруйданыыта — эмиэ сабылынна. Хаттаан ыытыллыбыт экспертиза учаастак сыаната хас эмит төгүл аччаабытын быһаарбыт: Попов мэрияҕа ити сир иһин 566 тыһ. солк. төлөөбүт, бэйэтигэр суруттарбыт, онтон атыылаабыт эбит буоллаҕына, ити сиринэн электропередача уонна гаас линиялара ааһалларынан, 2012 сыл кулун тутар 16 күнүнээҕи туругунан сыаната 161,2 тыһ. солк. тэҥнэспит.
Инньэ гынан, Холуобунай кодекс 159-с ыст. 3-с чааһынан тэриллибит дьыала ити ыстатыйа 1 чааһыгар (түөкүннээһин) уларытыллан, ыара суох буруйдарга киирсэринэн, киһини холуобунай эппиэтинэскэ тардар болдьох ааспытынан (икки сыл ааспыт) диэн, дьыала сабыллыбыт.
Оттон үһүс холуобунай дьыала силиэстийэлэнэ сылдьар. Бу да дьыала сабылыннаҕына, киһи аны соһуйбат.
Вера Макарова, «Саха сирэ» хаһыат, edersaas.ru
Хаартыска: интэриниэттэн.