Ааспыт субуотаҕа Туймаада хочо килбэйэр киинигэр күүтүүлээх спорт бырааһынньыга – “Чөмпүйүөн Кубога” – буолла. Бу олунньуга бэс ыйын эргиппит, үтүө үгэскэ кубулуйан сыллата ыытыллар күрэхтэһиигэ ыраахтан-чугастан аҕыс боотур ох курдук оҥостон, аат ааттаан кэлэн өбүгэ оонньуутугар күрэс былдьаста.
“Триумф” Спорт киинин киэҥ уораҕайыгар толору мустубут спорду сэҥээрээччилэр Егор Филиппов (Хаҥалас), Николай Матаннанов (Таатта), Дьулустаан Ноговицын (Горнай), Артем Варданян, Антон Тойтонов (Нам), Алексей Иванов (Үөһээ Бүлүү), Леонид Филиппов (Амма) итиэннэ Иннокентий Миронов (Өлүөхүмэ) спорт сэттэ көрүҥэр иэмэх мастыы эрийсиилэрин, илин-кэлин түсүһүүлэрин бэркэ сэргээн көрдүлэр-иһиттилэр.
Бу да сырыыга “Дыгын оонньууларын” икки төгүллээх кыайыылааҕа, атах оонньуутугар спорт маастара Егор Филиппов үчүгэй бэлэмнээҕин көрдөрөн, бастакы биэс көрүҥ түмүгүнэн инники тахсан, күрэхтэһиини баһылаабытынан-көһүлээбитинэн барар. Ол курдук, Хаҥалас боотура оҕунан ытыыга — иккис, “үс төгүл үскэ” – бастакы, “тутум эргииригэр” – бэһис, хапсаҕайга – бастакы, мас тардыһыытыгар – бэһис көрдөрүүлэнэн дэгиттэр спортсмен буоларын итэҕэттэ.
Киниттэн баара-суоҕа биир очукуонан хаалан испит Артем Варданян икки тиһэх көрүҥҥэ – 400 м сырсыыга уонна “тааһы көтөҕүүгэ” – куруутун эрбии тииһинии эрийсэр күрэстэһээччитигэр улахан утарсыыны оҥорор туһуттан бары күүһүн, өйүн-санаатын түмпүтэ эрэбил. Ол эрэн 400 м сырсыыга Филиппов биэтэккэ бастакынан кэлэн балаһыанньатын лаппа тупсарыммыт курдуга эрээри, Варданяҥҥа бастыыр кыах кыра да буоллар син биир баара. Ону ситиһэр инниттэн Варданян “тааһы көтөҕүүгэ” хайаан да бастыахтааҕа, оттон Филиппов бэһис миэстэттэн өнүйүө суохтааҕа. Түмүккэ Варданян үһүс, Филиппов төрдүс көрдөрүүлэннилэр.
Онон Хаҥалас боотура Егор Филиппов саха төрүт оонньууларыгар Иван Белолюбскай бирииһигэр өрөспүүбүлүкэтээҕи күрэскэ үһүс кыайыытын сурунна. Артем Варданян (Нам) иккис, Николай Матаннанов (Таатта) иккис, үһүс буоллулар.
Роман ПОПОВ, “Саха сирэ” хаһыат, edersaas.ru