«Туймаада ыһыаҕын» биир саамай кэтэһиилээх, долгутуулаах тэрээһинэ — «Дыгын оонньуулара». Икки күн устата ыытыллыбыт күөн күрэскэ уолаттар бары ох курдук оҥостон кэлэннэр, эрбии тииһин курдук эгил-тэгил кииристилэр. Түмүккэ, Хаҥалас улууһун чулуу спортсмена Егор Филиппов кыайыылааҕынан таҕыста. Кини бу «Дыгын оонньуутугар» төрдүс төгүлүн чөмпүйүөннээтэ.
Иккис бочуоттаах миэстэни Артем Варданян ылла. Үһүс бириистээх миэстэҕэ Леонид Филиппов таҕыста.
Кыайыылаахтары, «Дыгын оонньуутун» бары кыттыылаахтарын Ил Дархан Айсен Николаев уонна Дьокуускай куорат баһылыга Сардаана Авксентьева эҕэрдэлээтилэр. Барыларыгар сыаналаах бэлэхтэри туттардылар. «Дыгын оонньууларын» кыайыылааҕар —Егор Филипповка «Арктик Капитал» туруорбут 1 мөлүйүөн солкуобайдаах сертификата туттарылынна.
«Дыгын оонньууларын» кыайыылааҕа, үгэс быһыытынан, Ыһыах бэлиэтин — Ытык Дуоҕаны олохтоммут сириттэн ылан, Туймаада киэҥ нэлэмэн хочотугар унаар сайыны түстүүр ыһыах түмүктэммитин кэрэһилиир.
+1
+1
+1
+1
+1
+1
+1