Егор Филиппов — «Дыгын оонньууларын» бэһис төгүллээх кыайыылааҕа!

Ааптар: 
Бөлөххө киир:

Икки күннээх эриирдээх-мускуурдаах, түһүүлээх-тахсыылаах үгэс буолбут «Дыгын оонньууларын» күрэхтэһиитэ түмүктэннэ. Икки күн тухары тыҥааһыннаах, өрө күүрүүлээх күрэхтэһиини көрдүбүт.

«Дыгын оонньууларын» иккис күнэ ох саанан ытыыга күрэхтэһиинэн саҕаланна. Ол курдук кыраҕы харахтаах ытааччылар куобах, анды, тииҥ уонна кус сыалын ыттылар. Бу көрүҥ тыҥааһыннаах киирсиитин Егор Филиппов уонна Никита Ноговицын көрдөрдүлэр. Ол курдук онус төхтүрүйүүгэ Егор Филиппов утары олорор тииҥ сыалын эрэллээхтик табан үһүс Икки эргиир түмүгүнэн инники күөҥҥэ таҕыстылар:
1 миэстэ — Дьулустаан Ноговицын (Горнай)
2 миэстэ — Леонид Филиппов (Амма)
3 миэстэ — Егор Филиппов (Хаҥалас)

Иккис түһүмэххэ үгэс буолбут «Кыыс эккирэтиитигэр» 400 м уһуҥҥа саха боотурдара быһый атахтарынан илин кэлин түһүстүлэр.
Бу көрүҥ түмүгэр:

1-кы миэстэ — Тимофей Большаков (Сунтаар)
2-ис миэстэ Леонид Филиппов (Хаҥалас)
3-үс миэстэ Вячеслав Дьяконов (Нам)

Оонньуу үһүс түһүмэҕэр саха мадьынылара харахтаах эрэ хайгыыр, сүрэхтээх эрэ сөбүлүүр өрө күүрүүлээх уонна халбас харата хапсаҕай оонньуутугар күөн көрүстүлэр. Бу күөн көрсүүгэ быһаарыылаах киирсиини Егор Филиппов (Хаҥалас) уонна Владимир Федоров (Ньурба) икки ардыларыгар буолла.

Бу киирсиигэ эрэллээх кыайыыны Дыгын оонньууларын түөрт төгүллээх кыайыылааҕа Егор Филиппов ситистэ.
Хапсаҕай түмүгүнэн:
1-кы миэстэ — Егор Филиппов (Хаҥалас)
2-ис миэстэ Владимир Федоров (Ньурба)
3-үс миэстэ Вячеслав Дьяконов(Нам)

Дыгын оонньууларын түмүктүүр түһүмэх 116 киилэ ыйааһыннаах таас көтөҕүүтүгэр буолла. Бу көрүҥҥэ «Дыгын оонньууларын» муҥутуур көрдөрүүтүн куоһаран норуокка Таас Бухатыыр диэн аатынан биллибит Никита Новгородов 200 м барда.

Иккис миэстэҕэ эрэллээхтик Егор Филиппов таҕыста, үһүс миэстэни Николай Матаннанов ылла. Икки күннээх эрийсиилээх күрэхтэһиини түмүктүүр оонньуутугар алта көрүҥ түмүгүнэн бастаан испит Вячеслав Дьяконов тааһын мүччү тутан кэбиһэн оонньуу түмүгүн уларытан кэбистэ.

Уопсай түмүгүнэн Хаҥалас хотойо Егор Филиппов бэһис төгүлүн «Дыгын оонньууларын кыайыылааҕын үрдүк аатын сүктэ.

Иккис миэстэҕэ Таатта улууһун бастыҥ мадьыныта Николай Матаннанов таҕыста.

Үһүс миэстэҕэ Горнай улууһун бөҕөһө Дьулустаан Ноговицын буолла.

Дыгын оонньууларын биэс төгүллээх кыайыылааҕа Егор Филиппов кыайыытын күн сирин көрдөрбүт ийэлээх аҕатыгар анаата: «Бэҕэһээҥҥи туругунан кыттарым даҕаны биллибэт этэ, ол эрэн сылы быһа дьарыктанан баран хайдах кыттыам суоҕай диэн санааттан кыттыбытым. Эчэйии кэнниттэн кыайыыга эрэлим суоҕа, ордук сүүрүүттэн саллыбытым. Эдэр уолаттарга этиэм этэ кыайыыларгыт өссө да иннигитигэр, өр сыллаах дьарык үлэ кэнниттэн биирдэ кыайыы кэлэр. Мин 15 сыл — олоҕум аҥаарын дьарыктаныыга анаатым. Өссө да бэйэҕитин көрдөрүөххүт.  Үүнэр көлүөнэ ыччакка спордунан дьарыктаныҥ диэн этиэм этэ».

edersaas.ru

СИА хаартыскаҕа түһэриитэ

+1
0
+1
0
+1
0
+1
0
+1
0
+1
0
+1
0