Биллиилээх хореограф, Арассыыйа үтүөлээх артыыһа, режиссёр Егор Дружинин Саха сирин олохтоохторун Muus uStar ыччат бэстибээлигэр кыттарга ыҥырар. Бэстибээл Дьокуускай куоракка кулун тутар 25-26 күннэригэр ыытыллыахтаах. Тэрээһин иитинэн артыыс маастар-кылааһа буолуоҕа.
«Үҥкүүнү олохторун биир быстыспат сороҕото оҥостубут дьон өрөспүүбүлүкэҕэ элбэхтэрэ буолуо. Онон талааҥҥытын арыйан уонна ыччат бэстибээлигэр дьоҥҥо-сэргэҕэ көрдөрөр сыаллаах, бу тэрээһиҥҥэ кэлэн кыттаргытыгар ыҥырабын », – диэн артыыс эдэр дьоҥҥо туһаайан эттэ.
Санатан эттэххэ, быйылгы тэрээһин бырагыраамата 12 тректэн турар, ол иһигэр «Кинематограф и искусство», «Журналистика и блогинг», «Digital и IT», «Мультипликация и анимация», «Спорт», «Киберспорт», «Мода». Бырагыраамаҕа саҥа хайысхалар киирдилэр: «Молодой учёный» уонна «ESG». Бэстибээл иитинэн араас куонкурустар, көрсүһүүлэр, маастар-кылаастар ыытыллыахтара.
Бэстибээл хедлайнердарынан кинорежиссер, сценарист, Арассыыйа норуодунай артыыһа Алексей Учитель, хореограф, Арассыыйа үтүөлээх артыыһа Егор Дружинин, Tik-tok блогер Фросик Фрося, Instagram-блогер Елена Саморукова, Матч-ТВ уонна YouTube-ханаал ыытааччыта Карен Адамян уонна да атыттар буолуохтара. Тэрээһини Антон Комолов уонна Михаил Башкатов ыытыахтара. Кинилэргэ олохтоох ыытааччылар көмөлөһүөхтэрэ.
ЫСПЫРААПКА:
Тэрийээччи – СӨ бырабыыталыстыбата уонна Росмолодёжь. Генеральнай партнёр – «Эльгауголь» хампаанньа, партнёрдар – «Якутия» АХ, Транснефть. Информационнай партнёрдар – МУЗ-ТВ уонна Rutube. https://muusustar.ru/ саайтка киирэн регистрацияланыҥ!