Олунньу 22 күнүгэр Дьокуускай куоракка Гагарин аатынан култуура дьиэтигэр кэтэһиилээх “Егор Чээрин” киинэ сүрэхтэннэ.
edersaas.ru
Киинэ иннигэр араас кэмҥэ буолбут сэрии кыттыылаахтарын чиэстээһин долгутуулаах түгэнэ буолан ааста. Ол кэнниттэн, “Егор Чээрин” киинэни устубут бөлөх сыанаҕа тахсан хартыынал туһунан көрөөччүлэргэ кэпсээтилэр.
Киинэ режиссера, бүтэһиктээх сценарий ааптара Дмитрий Кольцов киинэтин туһунан маннык эттэ:
— Аныгы оҕолор «супергеройдар” уобарастарын көрө улааттылар. Оттон биһиги киинэбитинэн дьиҥнээх дьоруойдар — дойдуларын көмүскүүр саллааттар тустарынан судургу сэһэни көрдөрө сатаатыбыт. Кэлэр көлүөнэ бэйэтин өбүгэлэрин ытыктыы улаатыахтаах диэммит!
Биэс сыл устата элбэх уустуктары көрсүбүт бырайыак киинэ тыйаатырыгар көстөр күнүгэр диэри, элбэхтэ уларыйан кэллэ. Маҥнайгы састаабыттан элбэх артыыс уларыйбыт, хартыынаҕа кэпсэнэр устуоруйа олоччу саҥаттан уһуллубут. Былырыын сүрэхтэниэхтээҕин, аны, хамсык кэлэн мэһэйдээбитэ.
Ол да буоллар, күүтүүлээх киинэбит соһуччу үчүгэй буолан тахсыбыт диэххэ сөп. Ыйыталаһан көрбүтүм, маҥнайгы көрөөччүлэр үксүлэрэ туох да эҥкилэ суох, киһини умсугутар киинэ диэн сыана быстылар. Киинэ кэнниттэн ырытыыга Егор Чээрин туһунан кэпсээннэр ааптардара Тимофей Сметанин төрөппүт кыыһа Татьяна Тимофеевна көрбүт киинэтиттэн олус астыммытын туһунан эттэ, киинэ оҥорор бөлөххө махтанна.
“Егор Чээрин” киинэ кулун тутар 11 күнүттэн өрөспүүбүлүкэ киинэ тыйаатырдарыгар тахсаары турар.
«Саха сирэ» хаһыат, edersaas.ru