Алтынньы 23 күнүгэр Саха Өрөспүүбүлүкэтин Ил Дархана Егор Борисов Дьокуускайга кэлэ сылдьар Арассыыйа боксаҕа федерациятын генеральнай сэкирэтээрэ Умар Кремлевы кытта көрүстэ.
Кэпсэтии сүрүннээн дойду 2018 сыллааҕы боксаҕа чөмпүйэнээтэ Дьокуускайга ыытыллыан сөбүн тула барда.
Кремлев иһитиннэрбитинэн, федерация билиҥҥитэ чөмпүйэнээти ханна ыытыаҕын быһаара илик. Дойду улахан күрэхтэһиитин тэрийиэн баҕалаах куорат элбэх, күн бүгүн 15 регион сайаапкатын биэрэн олорор. Олор ортолоругар Бурятия, Хабаровскай кыраай, Краснодар бааллар. Чөмпүйэнээт ханна буолара кэлэр ый эргэтигэр, куонкурус түмүгэ таһаарылыннаҕына биллиэҕэ. Бокса федерациятын салайааччы Дьокуускай куорат биир дьоһун хандьыдаатынан буоларын бэлиэтээтэ.
Роман Попов, “Саха сирэ” хаһыат, edersaas.ru