“Медиалогия” хампаанньа регионнар салайааччылара информацияны киэҥник тарҕатар сириэстибэлэргэ, социальнай ситимнэргэ төһө ахтыллалларын кэтээн көрдө. Сэтинньи ый түмүгүнэн, 85 регионтан СӨ Ил Дархана Егор Борисов уон бастыҥнар кэккэлэригэр киирдэ.
Хампаанньа рейтинин ыытарыгар регион лидердэрэ үлэлэрин дьоҥҥо-сэргэҕэ төһө кэпсииллэрин, кинилэр тустарынан ханна, туох суруллубутун учуоттуур. Интэриниэт үйэтэ буолан, үксүн сайтарга, ону сэргэ, социальнай ситимнэргэ кинилэр ааттара төһө ахтыллыбытынан көрөн сыаналыыр буолуохтаахтар. Санатан эттэххэ, Егор Афанасьевич социальнай ситимнэртэн “Фейсбукка” уонна “Инстаграмҥа” аккауннардаах. “Инстаграмҥа баар страницабар бэйэм суруйабын”, — диэн блогердары кытары көрсүһүүтүгэр иһитиннэрэн турар.
Бу рейтиҥҥэ үс бастыҥ салайааччылар кимнээхтэрий диир буоллахха, Чечня, Москва, Крым лидердэрэ Рамзан Кадыров, Сергей Собянин, Сергей Аксенов ааттаммыттар. Рамзан Ахматович соһуччу этиилэри оҥортоон уонна ханна бара сылдьыбытын, кимниин көрсүбүтүн барытын интэриниэккэ таһаара олорор буолан, дойдуга харах далыгар сылдьар. Оттон Сергей Собянин – Москва, Сергей Аксенов – Крым салайааччылара буоланнар, дьон-норуот кинилэр хамсаныыларын кыраҕытык кэтиир.
Рейтиҥҥэ уон бастыҥнар ахсааннарыгар өссө Евгений Куйвашев (Свердлов уобалаһа), Александр Бречалов (Удмуртия), Рашид Темрезов (Карачаево-Черкесия), Андрей Воробьев (Москва уобалаһа), Дмитрий Азаров (Самара уобалаһа) уонна Дмитрий Овсянников (Севастополь) киирдилэр.
Аграфена КУЗЬМИНА, “Саха сирэ” хаһыат, edersaas.ru