Егор Борисов үлэ дьонун өйүүр, наадалаах быһаарыыны тута ылар салайааччы, тыа сирин кэлим сайыннарыыга үгүс үлэни ыытта. Элбэхтэн аҕыйаҕы холобурдаатахха, Тыа хаһаайыстыбатын туһунан сокуон ылылынна, үүт-эт субсидията биллэрдик үрдэтилиннэ, сири таҥастыыр тиэхиньикэни атыылаһыы, сүөһү иитэр комплексы туттуу ороскуотун 80-90 %-а бүддьүөттэн толуйуллар буолла. Үлэлииргэ табыгастаах усулуобуйа тэриллэн, тыа сиригэр ыччат олохсуйда, сүөһү үлэтигэр сыһынна.
Өрөспүүбүлүкэ салалтатын муоһатын Айсен Николаев туппутун үөрэ иһиттим. Кини 2011 с. биһиги сүөһү иитэр комплекстары тутууга бүддьүөттэн көмө наадатын туруорсубуппутун өйөөн, 10 мөл. солк. субсидия көрүллэрин ситиспитэ үлэбитигэр улахан тирэх буолбута. Онон, Айсен Сергеевич тыа сиригэр болҕомтотун ууруо диэн эрэнэбин. Эҕэрдэлиибин, ситиһиилэри баҕарабын.
Таисия Десяткина, Мэҥэ Хаҥалас улууһун “Тумул” кэпэрэтиип салайааччыта, Тыа сирин үлэһит дьахталларын сойууһун салайааччы, Саха сирэ» edersaas.ru. сайтка анаан