Егор Борисов: Тарас Десяткин бырамыысыланнас сайдыытыгар дьоһун кылаатын киллэрбитэ

Бүгүн Социалистическай Үлэ Дьоруойа, Ленин, Үлэ Кыһыл Знамята уонна Октябрьскай Революция уордьаннар кавалердара, РСФСР үтүөлээх металлура, Саха АССР үтүөлээх горняга, үс степеннээх «Шахтерская слава» бэлиэ толору кавалера, Саха Өрөспүүбүлүкэтин бочуоттаах олохтооҕо Тарас Гаврилович Десяткин олохтон туораата.

СӨ Ил Дархана Егор Борисов уһулуччулаах киһи, өрөспүүбүлүкэ бырамыысыланнаһын сайдыытыгар сүҥкэн улахан кылаатын киллэрбит Тарас Десяткин олохтон туораабытынан аймахтарыгар, чугас дьонугар дириҥ кутурҕанын биллэрдэ.
Егор Афанасьевич инстаграмыгар:

«Өрөспүүбүлүкэҕэ эрэ буолбакка бүтүн дойду үрдүнэн бырамыысыланнас сайдыытыгар улахан кылаатын киллэрбит улуу киһибит суох буолла. Тарас Десяткин дьаныардаах үлэтинэн таас чох, алмаас бырамыысыланнаһа сайдыбыттара  да диэтэхпитинэ алҕаһаабаппыт буолуо. Кини дьиҥнээх Дьоруой этэ. Бэйэтин үлэтигэр бэриниилээҕэ…Хомойуох иһин,  Тарас Гаврилович 90 сааһыгар тиийбэккэ, бу олохтон күрэннэ.  Биһиги кини үбүлүөйүн бэлиэтээри бэлэмнэнэ сылдьыбыппыт. Кэлиҥҥи сылларга кини олоҕор ыарахаттары көрсүбүтэ. Биһиги кинини өйүүр, көмөлөһөр этибит. Ытыктабыллаах Тарас Гаврилович, сылаастык утуй!»,- диэн суруйда.