Бэрдьигэстээххэ ыытыллыбыт мунньахха Ил Дархан Егор Борисов эбийиэккэ барытыгар, бастатан туран, олорор дьиэлэргэ сылааһы ыытар соругу туруорда.
Мунньахха Бырабыыталыстыба бэрэссэдээтэ Евгений Чекин бэҕэһээ киэһэ Бэрдьигэстээх сэлиэнньэтин «РИК» хочуолунайыгар умайыы тахсыбыт биричиинэтин, уокка эмсэҕэлээбит киһи суһал медицинскэй көмө кэлиэн иннинэ тыына быстыбытын кэпсээтэ. Чөлүгэр түһэриигэ ОДьКХ ГУТ улуустааҕы салаатын үлэһиттэрэ бары биир киһи курдук турунан үлэлии сылдьалларын, кинилэргэ Дьокуускайтан, Мэҥэ Хаҥаластан уонна Хаҥаластан кэлбит биригээдэлэр көмөлөһөллөрүн, Ньурбаттан уонна Сунтаартан эбии биригээдэ кэлэн иһэрин эттэ. Сылааһы бастакынан дьон олорор дьиэтигэр ыытар сорудаҕы толорон, коммунальщиктар билигин орто оскуола хочуолунайыттан эбии ситими тарда сылдьаллар, ону сэргэ куораттан аҕалыллыбыт хочуолунайы таҥаллар. Биригээдэлэр түүннэри үлэлиир усулуобуйалара тэрилиннэ, итии аһылык баар, уот ситимин ноҕуруускатын хонтуруоллуур дьуһуурустуба олохтонно. Сылаас бу түүнтэн саҕалаан график быһыытынан бэриллиэҕэ диэтэ.
Ыксаллаах быһыы-майгы өрөспүүбүлүкэтээҕи хамыыһыйатын бэрэссэдээтэлэ, Бырабыыталыстыба бэрэссэдээтэлин бастакы солбуйааччы Алексей Колодезников Дьокуускайтан сылытар пушкалар, чугуун оһохтор аҕалыллыбыттарын, аны сылытар ситими саҥардыыга эбии матырыйаал аҕалыллан иһэрин эттэ.
Мунньах түмүгэр Егор Афанасьевич ыксаллаах быһыы-майгы өрөспүүбүлүкэтээҕи хамыыһыйата саахалы туоратыыга, чөлүгэр түһэриигэ тэрийбит үлэтин сөптөөҕүнэн сыаналаата, уот турбут бастакы түгэннэриттэн ыла дьиэлэртэн дьоннор көһөрүллэн, тоҥон эрэр ситим уута сүөкэнэн, миэстэҕэ сөптөөх дьаһаллар ылыллыбыттарын бэлиэтээтэ.
Надежда Филиппова, Бэрдьигэстээх сэл. Молодежнай уулусса олохтооҕо:
— Чөлүгэр түһэр үлэ барар, сылаас график быһыытынан бэриллэрин эттилэр. Мантан түүн сылаас Ленин аатынан уулусса 9, 11, 13 уонна Строд уулусса 19 нүөмэрдээх дьиэлэригэр, атыттарга сарсын, өйүүн бэриллиэхтээх. Биһиги дьиэбит сылааска сарсын холбонуохтаах. Балаһыанньаны өйдүүбүт-билэбит, дьоммут иккис сууккаларын тохтообокко үлэлии-хамсыы сылдьаллар.
Раиса СИБИРЯКОВА, Саха сирэ” хаһыат, edersaas.ru