“Саха сиригэр сорох ас-үөл сыаната үрдээбитэ арҕааҥҥы дойдулар киллэрбит хааччахтарыттан тутулуга суох”, – диэн бэлиэтиир Федерация Сэбиэтин аграрнай-политическай бэлиитикэтигэр уонна айылҕа баайын туһаныыга кэмитиэтин бэрэссэдээтэлин солбуйааччы Егор Борисов бүгүн пресс-конференция кэмигэр.
– РФ бэрэсидьиэнэ Владимир Путин сыана үрдээһинин хонтуруоллааһын, аһы-үөлү дьаһаныы, о.д.а. тустарынан этэн турар. Саха сирин туһунан эттэххэ, биһиги эрэгийиэммитигэр сыана эмискэ өрө тахсыыта барыа суохтаах дии саныыбын. Онтон өскөтүн хааччахтар уһаан, балаһыанньа уустугурар түгэнигэр, сыана тахсар да буоллаҕына, ити төһө кыалларынан бытааннык барыан наада, дьон-сэргэ эмискэ оҕустарбатын курдук. Саха сиригэр биһиги аспытын-үөлбүтүн мунньан баран атыылыыр буоламмыт, сыана бытааннык тахсарын хонтуруоллуур кыах баар. Ол эрээри олохтоох табаардарга сыана үрдээһинэ хааччахтары киллэрииттэн тутулуга суох. Холобура, ынах арыытын сыаната үрдээбитэ бу табаарга дефицит баар буолбутун көрдөрөр. Уопсай ылан эттэххэ, нэһилиэнньэ күннээҕи туттар малын-салын, аһын-үөлүн сыаната эмискэ үрдээбэтин хонтуруоллааһын баар буолуоҕа, – диэн бэлиэтиир Егор Афанасьевич.
Аграфена КУЗЬМИНА