Бүгүн Юрий Трутнев Ил Дархан эбээһинэһин быстах кэмҥэ толорооччу Айсен Николаевы өрөспүүбүлүкэ саалатыгар билиһиннэрдэ. Егор Борисов Судаарыстыбаннай сүбэһитинэн ананна.
edersaas.ru
Егор Афанасьевич Юрий Трутневы уонна Айсен Николаевы өрөспүүбүлүкэ саалатын иннигэр илии тутуһан көрүстэ. Саалаҕа үһүөн киирдилэр.
“Бу күннэргэ мин ылыммыт быһаарыныыбар үгүс боппуруос үөскээбитэ. Хайдах, туох буолла диэн ыйыталлар. Бу туһунан дьоммор-сэргэбэр иһитиннэрэн турабын. Бастатан туран, Россия бэрэсидьиэнэ саҥа болдьоҕор талылынна. Владимир Путин инники сайдыыга улахан сыалы-соругу туруорда. Итини билигин олоххо киллэрбитинэн барыахха наада. Онуоха эһиил Ил Дархан быыбара буолар түгэнигэр, саҥа талыллыбыт салайааччы дьыала саҕаламмытын кэннэ ортотуттан ылсыахтаах этэ. Иккиһинэн, бэйэм үлэбэр каадыры аттаран туруорууга күүскэ үлэлэһэн кэллим. РФ бэрэсидьиэнэ билигин саҥа болдьоҕор каадырдары аттаран туруорууга үлэлэһэр сөптөөх дии саныыбын”, — диэн саала иһигэр мустан олорооччуларга иһитиннэрдэ.
Салгыы: “Айсен Николаев Ил Дархан э.т. анаммытыттан үөрэбин. Бу сыллар тухары Айсен Сергеевичтыын бииргэ үлэлээн кэллибит”, — диэн туран, киниэхэ үтүө түмүктээх үлэни, ситиһиини баҕарда.
Аграфена КУЗЬМИНА, “Саха сирэ” хаһыат, edersaas.ru