Егор Борисов сорудаҕынан суруналыыстар Витим суолун көрө-истэ барыахтара
Ленскэй улууһугар бырамыысыланнай эбийиэктэр үлэҕэ киириэхтэриттэн, «шлагбаум», «КПП» (суолу харабыллыыр пост) диэн тыллары олохтоохтор үгүстүк истэр буолбуттара ыраатта. Өссө үс сыллааҕыта «Сургутнефтегаз» Витим урбаанньыта Валерий Лейкин предпринимателлэртэн харчы туталларын утаран, алта чаас устата трассаны массыынатынан бүөлээн уонна травматическай бэстилиэтинэн салгыҥҥа ытыалаан, улахан аймалҕаны таһаарбыта.
edersaas.ru
Бүгүн «Сахамедиа» былаһааккатыгар ыытыллыбыт Ил Дархан Егор Борисов пресс-конференциятын кэмигэр бу боппуруоһу эмиэ таарыйдылар. «Блокнот. Якутск» сайт эрэдээктэрэ Айталина Никифорова Ленскэй улууһугар, чуолаан Витимҥэ бырамыысыланнай хампаанньалары кытары сыһыан бөрүкүтэ суоҕун эттэ. «Суол-иис боппуруоһа сытыытык турар. Урбаанньыт Лейкин төлөбүрдээх суолтан чаҕыйан, аны бурдугун таспат кыахтанна. Витимҥэ биир эрэ бэкээринэ баар. Онон, эмиэ үс сыллааҕыта тахсыбыт быһыы-майгы хатыланар чинчилээх», – диэн Ил Дархаҥҥа этии бэрээдэгинэн бэйэтин санаатын эттэ.
Онуоха, Егор Афанасьевич: «Мин ити кыһалҕаны билэбин. Ити икки өрүттээх. Сорохтор бырамыысыланнай хампаанньалары утараллар, сорохтор утарбаттар. Мин маннык этиилээхпин. Суруналыыстар Витимҥэ баран бэйэҕит балаһыанньаны кытары билсиҥ. Илэ хараххытынан баран көрөн-истэн кэлэргит наада. Айан ороскуотун бэйэм уйунуоҕум», – диэтэ.
Ленскэй улууһугар Арассыыйа атын эрэгийиэннэригэр курдук, төлөбүрдээх суол баар. Витим, Пеледуй, Толоон, Инньэли олохтоохторо Витим – Таалакаан туһаайыытынан, «Сургутнефтегаз» хампаанньа урукку кыһыҥҥы суол ааһар сиринэн туппут 115 км уһуннаах учаастагынан 2013 сыл тохсунньу 1 күнүттэн саҕалаан улахан харгыстары көрсөн айанныыллар. Пропискалаах дьон босхо айанныыр эбит буоллаҕына, атын сиргэ олорооччулар уонна коммерческай таһаҕаһы тиэйэр предпринимателлэр харчы төлүүллэр. Бу харчы суолу көрүүгэ, өрөмүөн үлэтигэр аттарыллар.
Анивера АКИМОВА, edersaas.ru