Федерация Сэбиэтин чилиэнэ, Аграрнай-продовольственнай бэлиитикэ уонна айылҕа баайын туһаныы кэмитиэтин бэрэссэдээтэлин солбуйааччы Егор Борисов Ил Түмэн дьокутааттарын кытары көрсүһүүтүгэр “Мин — инженербын” куонкурус Уһук Илин эрэгийиэннэргэ тарҕанарын өйүүрүн, “Саха ыччатын — бырамыысыланнаска” бырайыак сайдан иһиэхтээҕин туһунан иһитиннэрдэ.
edersaas.ru
Дьокутааттар ыйытыыларыгар хоруйдуон иннинэ Егор Афанасьевич Федерация Сэбиэтигэр туох, ханнык мунньахтар ыытыллыбыттарын, ханнык боппуруостары көтөхпүттэрин, ырыппыттарын кэпсээтэ. Кини этэринэн, ааспыт сылга Сэбиэккэ барыта 23 мунньах ыытыллыбыт, 570 сокуон бырайыага ырытыллыбыт. Оттон күһүҥҥү сессияҕа 8 мунньахха барыта 232 сокуон бырайыага дьүүлгэ тахсыбыт. Санатан эттэххэ, Федерация Сэбиэтэ икки сессиянан үлэлиир, саас уонна күһүн. Күһүҥҥү сессия балаҕан ыйыттан ахсынньыга диэри буолар.
Бу сессияларга Сэбиэт аһаҕас, сабыылаах мунньахтара, кэмитиэттэр ырытыһыылара буолаллар. Ону таһынан, бырабыыталыстыба чааһа, “төгүрүк остуоллар”, хамыыһыйалар мунньахтара ыытыллаллар. Манна даҕатан эттэххэ, Егор Борисов тулалыыр эйгэни харыстааһын анал хамыыһыйатыгар киирэн үлэлии сылдьар.
Сенатор дьокутааттар болҕомтолорун эрэгийиэннэртэн киирэр сокуон бырайыактарыгар уурда. Кини бэлиэтииринэн, 37 эрэгийиэнтэн барыта 120 сокуон бырайыага киирбититтэн түөрт эрэ сокуон ылыныллыбыт. Онон эрэгийиэннэр парламеннара сокуону оҥорууга сүрүн болҕомтолорун ууруохтаахтарын эттэ. Егор Афанасьевич бэлиэтииринэн, хас биирдии сокуон барыла РФ бырабыыталыстыбатыгар чинчийиини ааһар эбит. Үксүгэр бырайыактар бу түһүмэҕи кыайан ааспаттар. Ол иһин эрэгийиэннэр парламеннара уонна бырабыыталыстыбалара сөҥнөһөн, федеральнай министиэристибэлэри кытары ыкса үлэлэһэллэригэр сүбэлиир.
Түмүгэр Егор Борисов айылҕа баайын туһаныыга, тулалыыр эйгэни харыстааһыҥҥа, тыа хаһаайыстыбатыгар туох этиилэри киллэрбитин кэпсээтэ. Ол курдук, мунньахтарга, бырабыыталыстыба чааһыгар, “төгүрүк остуолларга” сэлии муоһун хостооһун, ону батарыы кыһалҕатын, тыа хаһаайыстыбатыгар кооперациялааһын, чааһынай кэтэх хаһаайыстыбалаах дьону өйөөһүн улахан оруоллааҕын, цифровой экэниэмикэни сайыннарыыга, бастатан туран, эрэгийиэннэргэ түргэн-тарҕан интэриниэти киллэрэ охсуохха наадатын, о.д.а. боппуруостары таарыйбыт. “Тыа хаһаайыстыбатын салайар Саха сирин сокуонугар киирбит сорох пууннара Арассыыйа сокуонугар суохтар. Ол иһин федерация таһымыгар ону эмиэ туруорсуохха”, — диэн бэлиэтээн эттэ. Ону сэргэ сенатор Уһук Илин уонна Забайкалье эрэгийиэннэрин сайдыытын сэбиэтин чилиэнин быһыытынан, энергетика, суол-иис боппуруостарын көтөхпүтүн эттэ.
Кэпсэтии кэмигэр Егор Борисовтан дьокутааттар үгүс боппуруоһу ыйыттылар. Нолуок, сыана уларыйыытын, Уһук Илин эрэгийиэннэргэ бэриллибит “биир гектар”, биэнсийэҕэ тахсар сааһы уларытыы, үөрэх, о.д.а. тиэмэтин таарыйдылар. “Сахатранснефтегаз” хампаанньа инженерэ Павел Ксенофонтов төрөөбүт төрүт тылы сайыннарыы, киинэлэри сахалыы тылбаастааһын туһунан, “Саха ыччатын — бырамыысыланнаска” уонна “Мин — инженербын” бырайыактар саҥа таһымҥа тахсан Уһук Илин эрэгийиэннэргэ тарҕаныахтаахтарын эттэ.
Егор Борисов бу бырайыактары Ил Дархан дуоһунаһыгар олорон өйөөбүтүн, салгыы да саҥа таһымҥа тахсарыгар күүс-көмө, тирэх буолуоҕун иһитиннэрдэ. “Бу бырайыактар саха ыччатын бырамыысыланнаска сыһыарыыга улахан көмөлөөхтөр. Бырайыактары өйүүбүн, онно көмөлөһөргө бэлэммин”, — диэн эттэ.
Бэлиэтээн эттэххэ, “Саха ыччатын — бырамыысыланнаска” бырайыак “Эдэр саас” “Саха сирэ” хаһыат ыччакка аналлаах сыһыарыытын оччотооҕу редактора Прокопий Бубякин, гаас бырамыысыланнаһыгар үлэлии сылдьар эдэр исписэлиистэр Павел Ксенофонтов уонна Айан Уваров көҕүлээһиннэринэн 2009 сылтан ыытыллар. Оччолорго Павел Ксенофонтов уонна Айан Уваров техническэй үөрэхтэр выпускниктарын сомоҕолуур түмсүүнү салайаллара. Онон эдэр исписэлиистэр күүстэрин түмэн өрөспүүбүлүкэҕэ биир улахан бырайыагы иитэн таһаардылар.
Аграфена КУЗЬМИНА, “Саха сирэ” хаһыат.