Ил Дархан Егор Борисов бу күннэргэ Москваҕа сырыытын кэмигэр РФ бырабыыталыстыбатын вице-премьерэ Дмитрий Козак регионнар сайдыыларын боппуруостарыгар ыыппыт Бырабыыталыстыба хамыыһыйатын мунньаҕар сырытта. Мунньахха регионнар бүддьүөттэрин, федеральнай хааһынаттан көрүллэр көмө харчыларын туһунан кэпсэттилэр.
edersaas.ru
Мунньахха РФ үбүн миниистирэ Антон Силуанов, Экономика миниистирэ Максим Орешкин, Федерация Сэбиэтин сенатордара, Судаарыстыбаннай Дуума дьокутааттара, федеральнай биэдэмистибэ салайааччылара уонна регионнар лидердэрэ кыттыыны ыллылар.
Былырыыҥҥыттан федеральнай да, региональнай да бүддьүөт үс сылга былааннанан оҥоһуллар буолбута. Бу былааннааһыҥҥа, биллэн турар, регионнар бүддьүөттэрин тэҥнээһин (федерация регионнарга дотация, субсидия, субвенция быһыытынан көмө харчы биэрэн бүддьүөттэрин дохуоттаах чааһын тэҥнээн биэрэр) улахан оруолу ылар. Манна даҕатан эттэххэ, РФ президенэ Владимир Путин Судаарыстыбаннай Сэбиэт президиумун балаҕан ыйынааҕы мунньаҕар эһиил тохсунньуттан саҕалаан бүддьүөттэн көрүллэр кирэдьииттэри реструктуризациялыырга, ол эбэтэр усулуобуйатын уларытан биэрэргэ, анал бырагыраама үлэлиэҕин туһунан иһитиннэрбитэ. Онуоха хас биирдии регион уратытын учуоттуурга саҥа инструмент наада.
Маны таһынан мунньахха регионнар кирэдьииккэ иэстэрин усулуобуйатын уларытан биэрэргэ дуогабары түһэрсии, бу сыллааҕы бүддьүөттэрин туолуутугар көрүллэр дотация туһунан кэпсэттилэр. Манна ордук кыра дохуоттаах регионнарга болҕомто уурдулар. Регионнарга сыһыаран бэйэ киллэринэр дохуотун элбэтиэхтээхтэрин (ол эбэтэр нолуок төлөөһүнэ, үлэ миэстэтин таһаарыы, инвестицияны киллэрии хаҥыахтааҕын) эттилэр.
Регионнар сыл устата социальнай-экономическэй сайдыыларын көдьүүстээхтик ыыппыт буоллахтарына, сыл түмүгүнэн эһиилигэр федеральнай бүддьүөттэн грант ылааччылар. 2016 с. грант быйыл бэриллиэхтээх. Санатан эттэххэ, регион төһөнөн үбүлээһини көдьүүстээхтик туһанар да, оччонон элбэх харчыны ылан, дохуотугар түһэр ноҕоруусканы кыччатыаҕын сөп.
Егор Борисов мунньах түмүгэр өрөспүүбүлүкэ нолуогу киллэриитин хаҥатан иһэрин бэлиэтээн эттэ. Эбэн эттэххэ, быйыл улахан хампаанньалар барыстарыттан киирэр нолуоктан ураты нолуоктарга эбиллии таҕыста.
Аграфена КУЗЬМИНА, “Саха сирэ” хаһыат, edersaas.ru