Быйыл Саха сирэ Арассыыйаҕа холбоспута 385 сылын биэлиэтиибит. Ол чэрчитинэн, Москваҕа өрөспүүбүлүкэбит күннэрэ саҕаланнылар. Бэҕэһээ Ил Дархан Егор Борисов Москва куорат мэрэ Сергей Собянины кытары көрүстэ.
Көрсүһүүгэ экономика, научнай-техническэй, социальнай эйгэ, култуура боппуруостарыгар Саха сирэ Москва бырабыыталыстыбатын кытары бииргэ үлэлэһэргэ баттаспыт дуогабарын туһунан кэпсэттилэр. Бу дуогабары Егор Борисов 2012 с. түһэрсэн турар. Маны таһынан Саха сирин күннэрин кэмигэр биһиги өрөспүүбүлүкэбит өссө үөрэх эйгэтигэр бииргэ үлэлэһэргэ дуогабар баттаһар санаалаах.
Санатан эттэххэ, Москваҕа Саха сирин күннэрин сүрүн тэрээһиннэрэ ахсынньы 13-18 күннэригэр ыытыллыахтара. Дуогабардары баттаһыы таһынан, дойдубут киин куоратын биир саамай улахан уораҕайыгар “Экспоцентрга” Саха сирин быыстапката туруоҕа, региоммут 2030 сылга диэри сайдыытын көрдөрөр стратегия сүрэхтэниитэ буолуоҕа. Ону сэргэ араас экспозиция, кэнсиэр, быыстапка ыытыллара күүтүллэр.
Маны таһынан Егор Афанасьевич 2018 с. Дьокуускайга буолуохтаах аан дойдутааҕы бастакы интеллектуальнай оонньууга болҕомтотун уурда. Даҕатан эттэххэ, бу тэрээһин туһунан Ил Дархан былырыыҥҥы “Азия оҕолоро” аан дойдутааҕы спортивнай оонньуулар кэмнэригэр иһитиннэрбитэ. Интеллектуальнай оонньуу чэрчитинэн, научнай конференция, физикаҕа, математикаҕа, химияҕа, информатикаҕа олимпиадалар ыытыллыахтаахтар. Билиҥҥи дааннайынан, аан дойду араас муннугуттан 1,5 тыһыынчаттан тахса оҕо кэлэрэ былааннанан турар. Итини этэн туран, Егор Борисов Москва үөрэнээччилэрин эмиэ кыттарга ыҥырда.
Кэпсэтии түмүгэр ЮНЕСКО дьыалаларыгар Арассыыйа хамыыһыйатын иһинэн Москваҕа Евразия култууратын киинин тэрийии, “Зарядье” пааркаҕа Саха сирин бастайааннай быыстапкатын туруоруу туһунан кэпсэттилэр. Бу паарка 2014 с. саҕалаан тутуллан, быйыл балаҕан ыйыгар аһыллыбыта. “Зарядье” Москва историятыгар ураты миэстэни ылар. Аҥаардас Кыһыл болуоссат, Кириэмил таһыгар эрэ турарынан буолбакка, паарка турар сиригэр араас тутуу бара сылдьыбытынан уратылаах. Паарка инникитин киһи сынньанарыгар биир ураты сир буолуохтаах.
Аграфена КУЗЬМИНА, “Саха сирэ” хаһыат, edersaas.ru.