Егор Борисов: “Өлбөт үйэлээх полк” сэлэлээн хаамыыта — Улуу Кыайыыны уһансыбыт, сэрии толоонугар охтубут буойуттары кэриэстээһин

Бүгүн, ыам ыйын 9 күнүгэр, Дьокуускайга, Аҕа дойду Улуу сэриитигэр Кыайыы 72 сылыгар аналлаах “Өлбөт үйэлээх полк” сэлэлээн хаамыыта буолла.

Өрөспүүбүлүкэ Ил Дархана Егор Борисов мустубут бар дьоҥҥо туһаайан, бу Улуу Кыайыыны уһансыбыт, сэрии толоонугар дьоруойдуу охтубут буойуттарга сүгүрүйүү, кинилэри ахтан-санаан ааһыы бэлиэтэ буоларын эттэ.

«Бүгүн Улуу Кыайыы 72 сылын бэлиэтиир өрөгөйдөөх күммүтүгэр,  Аҕа дойду уоттаах сэриитин толоонугар сырдык тыыннарын толук уурбут буойуттарбытын өйдөөн-санаан, кэриэстээн ааһабыт. Ол чэрчитинэн, атын куораттарга курдук, бүгүн Дьокуускайга, кинилэргэ сүгүрүйүү бэлиэтигэр сэлэлээн хаамабыт»,- диэтэ Егор Борисов. Ил Дархан соторутааҕыта эрэ көрсүбүт бу хамсааһыны көҕүлээччи Василий Лановой аатыттан, “Өлбөт үйэлээх полк” хамсааһын регионнааҕы штабын салайааччытыгар Елена Киселеваҕа эҕэрдэ тиэртэ.

Сэлэлээн хаамыы кыттыылаахтара Ленин болуоссатыттан саҕалаан, Хабаров уулуссатынан эргийэн Кыайыы болуоссатыгар тиийдилэр. Акция Богатырев уулуссатыгар түмүктэннэ.  Санатар буоллахха, былырыын “Өлбөт үйэлээх полк” сэлэлээн хаамыыга Дьокуускайга 20 тыһыынчаттан тахса киһи кыттыбыта.

Андрей СОРОКИН хаартыскаҕа түһэриилэрэ.