Егор Борисов Госдуума дьокутааттарын кытары хотугу улуустар кыһалҕаларын быһаарыста
Ил Дархан Егор Борисов бэҕэһээ Москваҕа Судаарыстыбаннай Дуума дьокутаата Галина Данчиковалыын көрсөн кэпсэттэ. Галина Иннокентьевна ааспыт нэдиэлэҕэ Саха сиригэр кэлэн нэһилиэнньэни кытары көрсөн барбыта.
edersaas.ru
Бастатан туран, уопсастыбаннай палаатаҕа предпринимателлэри кытары көрсүбүтэ. Манна уһук хотугу улуустарга орто, дьоҕус бизнес кыһалҕаларын, сокуоннарга уларыйыылар киириилэрин, хотугу улуустарга таһаҕаһы тиэйии, ыраах айаҥҥа суол сулууспаларын тэрийии туһунан кэпсэттилэр. Ону сэргэ предпринимателлэр үлэлэрин отчуоттуулларыгар, кыһынын тымныы ыйдарга каасса аппаратын туһаныыга ыарахаттары көрсөллөрүн эттилэр. “Предпринимателлэри кытары кэпсэтэн баран, төһө кыалларынан субу-субу көрсөргө сөбүлэстибит. Кинилэр кыһалҕаларын быһаарыыга предпринимателлэр бырааптарыгар боломуочуйалааҕы, туһааннаах министиэристибэни, биэдэмэстибэлэри кытары сүбэбитин холбоон үлэлэһиэхпит дии саныыбын”, — диэн бэлиэтиир кини.
Галина Иннокентьевна итини таһынан, Горнай улууһун олохтоохторун кытары көрсүбүтэ. Нэһилиэнньэ сүрүннээн бөһүөлэктэри тупсаран оҥоруу, саҥа эбийиэктэри тутуу, социальнай төлөбүрдэри, тыа хаһаайыстыбатынан дьарыктанан олорор дьон бырааптарын, элбэх оҕолоох ыалга көмө, баай-дуол, сир-уот, о.д.а. боппуруостары туоһуластылар. Ону таһынан, былырыын ойуур баһаарыгар үлэлээбит дьон хамнастарын ыла иликтэрин эттилэр. Санатан эттэххэ, бу боппуруоһу нэһилиэк баһылыктара Ил Дарханы кытары көрсүһүүлэригэр эмиэ бэлиэтээн тураллар. Ойуур сыһыаннаһыытыгар департамент иһитиннэрбитинэн, өрөспүүбүлүкэ өттүттэн туох баар төлөбүр ыытыллыбыт, билигин федеральнай бүддьүөт иэстээх олорор. Онон боппуруоһу федерация таһымыгар кэпсэтэ сылдьаллар. Егор Афанасьевич Галина Данчиковаҕа манна көмөлөһөргө эттэ.
Көрсүһүүгэ федеральнай сокуоннарга уларытыылары киллэрии туһунан кэпсэттилэр. Ол курдук, билигин балыктааһыҥҥа, сэлии муоһун хостооһунугар, почта үлэтигэр уларытыылары киллэрии туһунан кэпсэтии бара турар. Манна даҕатан эттэххэ, өрөспүүбүлүкэ олохтоохторо почта сырыытын боппуруоһун күүскэ туруорсаллар. Бу ордук суола-ииһэ суох кырыы сытар нэһилиэнньэлээх пууннарга, хотугу улуустарга сытыытык турар.
Түмүккэ, Егор Борисов Госдуума дьокутаатыгар бүддьүөтү тыырыыга, судаарыстыбаннай бырагыраамаларга, инвестицияҕа өрөспүүбүлүкэ уратыта хайаатар учуоттаныллыахтааҕын этэн туран, РФ үбүн уонна Уһук Илин сайдыытын министиэристибэлэригэр туспа мунньах ыытыллыаҕын туһунан иһитиннэрдэ. Ыспыраапка быһыытынан эттэххэ, РФ президенэ Владимир Путин Уһук Илин регионнар боппуруостара бары бырагыраамаларга туспа түһүмэҕинэн киириэхтээҕин туһунан эрдэ этэн турар.
Аграфена КУЗЬМИНА, “Саха сирэ” хаһыат, edersaas.ru.