Егор Борисов: «Гаас собуотун тутуутун бырайыагын туһунан миигин кытта ким да дьүүллэспэтэҕэ»
Ахсынньы 8 күнүгэр Ил Дархан Егор Борисов «Россия сегодня» аан дойдутааҕы медиа-бөлөх былаһааккатыгар федеральнай суруналыыстарга пресс-конференция биэрдэ.
edersaas.ru
Егор Борисов, бу иннинэ, Санкт Петербурга эмиэ суруналыыстары кытары көрсүбүтэ. Бу сырыыга араас хабааннаах ыйытыыларга хоруйдаата. Федеральнай суруналыыстар туризм сайдыытын боппуруостарын, Өлүөнэ өрүһү туоруур муоста, химическэй собуот тутуллууларын интэриэһиргээтилэр. Химическэй собуот тутуутун бырайыагын туһунан Егор Афанасьевичтыын ким даҕаны кэпсэппэтэҕин, ырытыспатаҕын эттэ.
— Өрөспүүбүлүкэҕэ улахан бырайыактар олоххо киириэхтэрин иннинэ, хайаан даҕаны, дьүүллэһэбит, кэпсэтэбит. Бастатан туран, эрэгийиэн баһылыгын таһымыгар.
Гаас собуотун тутуутун туһунан мин тугу да билбэппин. Миигин кытары ким даҕаны ити бырайыак туһунан дьүүллэспэтэҕэ, — диэн бэлиэтээн этэн туран, биэс сыл анараа өттүгэр биир хампаанньа гаас ситимин Охотскай муораҕа тутар санаалааҕын туһунан эппитин эбэн эттэ.
Анивера Акимова, edersaas.ru