Егор Борисов Саха сирин аатыттан Федерация Сэбиэтигэр бэрэстэбиитэлинэн анаммыта. Кини тыа хаһаайыстыбатын, айылҕаны харыстааһын, аһы-үөлү хааччыйыы боппуруостарыгар эппиэттиир кэмитиэт бэрэссэдээтэлин солбуйааччынан ананна.
Федерация Сэбиэтин бэрэссэдээтэлэ Валентина Матвиенко бу күннэргэ ыытыллыбыт мунньахха Егор Афанасьевичка сенатор дастабырыанньатын уонна бэлиэтин туттарда.
Егор Борисов саҥа үлэтин туһунан: “Бу кэмитиэт үлэтин хайысхата киэҥ. Аҥаардас тыа хаһаайыстыбатын, тыа сирин сайдыытын эрэ буолбакка, ойуур, уу, бултааһын-алтааһын, балыктааһын, айылҕа харыстабылын, аһыыр аспыт-үөлбүт хаачыстыбатын боппуруостарын барытын көрөр. Онон, бастатан туран, бу этиллибит боппуруостарынан күүскэ дьарыктаныаҕым. Туох баар уопуппун, билиибин-көрүүбүн ууран туран, Сахам сирин, дьонум туһугар үлэлиэҕим”, — диэн иһитиннэрэр бэйэтин Инстаграмыгар.
Аграфена КУЗЬМИНА, “Саха сирэ” хаһыат.
+1
+1
+1
+1
+1
+1
+1