Федерация Сэбиэтин чилиэнэ Егор Борисов тохсунньу 11 күнүгэр төрүт олохтоох аҕыйах ахсааннаах хотугу омуктарга сыһыаннаах федеральнай сокуоҥҥа уларытыылары киллэрэргэ үлэлэһэр Ил Түмэн дьокутааттарын кытары көрүстэ.
Дьокутааттар Елена Голомарёва, Владимир Прокопьев уонна Виктор Губарев Сир кодексатыгар 2018 сыл тохсунньу 1 күнүттэн киллэриллибит уларытыылары төрүт табыгаһа суоҕунан аахтылар. Тоҕо диэтэххэ, төрүт олохтоох аҕыйах ахсааннаах хотугу омуктар уонна кинилэр аҕа ууһунан общиналара тыа хаһаайыстыбатынан дьарыктаналларыгар сир учаастагын босхо туһанар кыахтара суох буолбут. Төрүт олохтоох аҕыйах ахсааннаах хотугу омуктар бырааптарын мэктиэлээһин туһунан федеральнай сокуон кинилэргэ сири босхо биэрэр туһунан этэрин үрдүнэн, ол бырааптара сүппүт. Аҕа ууһун общиналара таба мэччирэҥин түүлэһэр, төлөбүргэ эрэ ылар буолбуттар. Арктика улуустарыгар таба мэччирэҥэ уонна бултуур учаастактар кыйаар сиринэн тайыылларын аахтахха, ол харчыта хас эмит сүүһүнэн тыһыынча буолар! Бу иһитиннэриини Погодаев аатынан община баһылыга, аҕа ууһун общиналарын өрөспүүбүлүкэтээҕи сойуустарын бырабылыанньатын чилиэнэ Мария Погодаева биир гектар сири түүлэһии төлөбүрэ биир гектарга биир солкуобай буолара табаларын хас эмит тыһыынчанан гектардаах сиринэн мэччитэр хаһаайыстыбаларга ыараханын эттэ. Дьокутааттар Сир кодексатыгар уларытыылары хос көрөргө Саха Өрөспүүбүлүкэтэ хас эмит сыл устата туруорсар этиитин Федерация Сэбиэтигэр туруулаһарга Егор Борисовтан көрдөстүлэр.
Баайга-дуолга уонна сиргэ сыһыаннаһыы миниистирин солбуйааччы Ньургустаана Пахомова төрүт үгэстэринэн дьарыктанар аҕа ууһун общиналарын тэрээһиҥҥэ уонна быраапка статустарын боппуруоһа сүнньүн була илик диэтэ. Бэрт ахсааннаах эрэ община кэмиэрчэскэйэ суох тэрилтэнэн регистрацияламмыт, атыттар тыа хаһаайыстыбатын табаарын оҥорон таһаарааччы, атыннык эттэххэ, кэмиэрчэскэй тэрилтэ быһыытынан сылдьаллар. Ити иһин сири босхо туһанар кыахтан маппыттар, онон кэмиэрчэскэйэ суох тэрилтэ статуһун ылаллара тыын суолталаммыт.
– Бу боппуруостары, бастатан туран, өрөспүүбүлүкэ иһинэн быһаарыахха наада, оттон федеральнай таһымынан хас да варианынан, ол иһигэр сокуоннарга үлэлиир ирдэнэр, – диэтэ Егор Борисов. – Федерация Сэбиэтигэр биһиги, биллэн турар, туруорсуохпут. Ол эрээри, толоруулаах былаас сокуоҥҥа субъектар көҕүлээһиннэригэр бэрт сэрэхтээхтик сыһыаннаһарынан, бырабыыталыстыба структураларын кытары бары биир сүбэнэн, холкутук, утумнаахтык үлэлиэхтээхпит. Этиилэрбитин дакаастыыр, ылыннарар гына, итэҕэтэр туһугар.
Егор Борисов түмүгэр, өрөспүүбүлүкэҕэ боччумнаах суолталаах сокуон бырайыактарын хамсатыыга араас варианнары көрдүүр уонна ырытар оробуочай бөлөҕү тэрийэргэ сүбэлээтэ.
Раиса СИБИРЯКОВА, «Саха сирэ» хаһыат, edersaas.ru