Егор Борисов бэрэссэдээтэллээх ХИФУ Кэтээн көрөр Сэбиэтэ дьиэни өрөспүүбүлүкэҕэ биэрэри сөбүлэстэ
Ил Дархан Егор Борисов бэрэссэдээтэллээх М.К.Аммосов аатынан ХИФУ Кэтээн көрөр Сэбиэтин мунньаҕа буолла. Мунньахха университекка бэриллибит Гуманитарнай бакылтыаттар куорпустарын өрөспүүбүлүкэ босхо туһанарыгар биэрэри өйөөтүлэр.
edersaas.ru
Егор Борисов Арассыыйа үөрэҕин уонна наукатын миниистирэ Ольга Васильева аатыгар, университет Ленин проспегар турар тутуутун чааһын федеральнай бас билииттэн өрөспүүбүлүкэ бас билиитигэр биэриҥ диэн ис хоһоонноох сурук ыыппыта.
Санатан эттэххэ, 2010 сыллаахха СӨ бырабыыталыстыбата университет материальнай-техническэй базатын сайыннараары, тустаах дьиэни университекка босхо биэрбитэ. Ити дьиэттэн, университет бүддьүөтү таһынан үбүнэн “Алмаасэргиэнбаантан” 2,9 тыһ.кв. м. эбии атыыласпыта. “Бэйэтин кэмигэр өрөспүүбүлүкэ Хотугулуу-Илиҥҥи федеральнай университеты өйөөбүтэ уонна Ленин проспегар турар тутуу сорох чааһын (площади) өрөспүүбүлүкэ бас билиититтэн федеральнай бас билиигэ биэрбитэ. Билигин университет ону Саха сиригэр төнүннэрэр туһунан быһаарыы ылынна”, – диэн Егор Борисов быһаарда.
Мунньах кэмигэр үөрэх кыһатын Кэтээн көрөр Сэбиэтин чилиэннэрэ Ил Дархан этиитин өйөөтүлэр. ХИФУ ректора Евгения Михайлова Ленин проспегар турар 1-кы нүөмэрдээх тутуу типовой бырайыага суоҕун туһунан эттэ. “Дьиэ типовой бырайыагынан оҥоһуллубатах, Судаарыстыбаннай баһаарынай надзор ирдэбилигэр эппиэттээбэт аудиториялар, кыараҕас көрүдүөрдэр”, – диэн иһитиннэрдэ.
Өрөспүүбүлүкэ билигин кураанах турар дьиэлэргэ наадыйар. Эрдэ, Ленин проспегар турар дьиэҕэ IT-киини олохтуур туһунан боппуруос көрүллэр диэн иһитиннэрбиттэрэ. Өскөтүн, дойду Үөрэҕин уонна наукатын министиэристибэтэ сөбүлэһэр түгэнигэр, ити дьиэни федеральнай бас билииттэн эрэгийиэн бас билиитигэр информационнай технология эйгэтин сайыннарыыга босхо биэрэр наада диэн этилиннэ.
Итини сэргэ, университет бүддьүөтү таһынан үбүнэн атыыласпыт ороскуотун төнүннэрии боппуруоһун эмиэ кэпсэттилэр.
Университет баайы-дуолу бэйэтэ талбытынан дьаһайар бырааба суох буолан, ХИФУ 2017 сыл уонна 2018-2019 сыллардааҕы үп-хаһаайыстыбаннай үлэтин былааныгар уларытыылары киллэрэр туһунан боппуруоска быһаарыы ылыннылар.
Людмила Попова, “Саха сирэ” хаһыат, edersaas.ru