Егор Борисов баһаартан тыҥааһыннаах балаһыанньа үөскээбит учаастактарын бөртөлүөтүнэн кэрийдэ
Киин уонна илин эҥээр улуустарга бэс ыйын устатыгар уонна от ыйын бастакы дэкээдэтигэр халлаантан биир таммах ардах түспэккэ, сир-дойду олус куурда-хатта.
Быйыл өрөспүүбүлүкэ үрдүнэн 207 баһаар туран, 23 тыһ. 577 гектар сири, ол иһигэр 15 тыһ. 707 гектардаах ойууру хапта. (Былырыын баччаларга 109 баһаар турбута, 7 тыһ. 978 гектар тыаны сиэбитэ). Итинтэн, билиҥҥи туругунан, 190 баһаар бохсулунна, бу иһиттэн 21 баһаар нэһилиэнньэлээх пууннар тастарыгар, ол эбэтэр хонтуруолланар зонаҕа баар. Ил Дархан Егор Борисов от ыйын 3 күнүттэн ыксаллаах быһыыны-майгыны биллэриэҕиттэн, 78 баһаар умуруорулунна. Турбут уот төһө суһаллык бохсуллубутун ырыттахха, маннык көрдөрүү тахсар: биллэрии киирбит бастакы күнүгэр 35 (18,4%), сарсыныгар – 73 (38,4 %), икки хонугунан – 34 (17,9 %), үс-биэс күнүнэн – 32 (16,8%), уон хонук иһинэн – 13 (6,8%), уонтан элбэх күнүнэн – 3 (1,6%) баһаар умуруоруллубут. Онон турбут уот үс гыммыт биирэ икки-үс хонук иһинэн умуруоруллубут эбит.
Тустаах сулууспалар быһааралларынан, баһаар 60 %-на этиҥтэн, 28 %-на киһи дьалаҕайыттан, уоту сэрэҕэ суох туттуутуттан, ол иһигэр табахтан (47 түбэлтэ), кулуһуну умуруорбакка барыыттан (тоҕус түбэлтэ), өртөөһүнтэн (икки сиргэ), оһох алдьаммыт турбатыттан (биир сиргэ) барбыт. Билигин аҕыс улууска 17 сиргэ ойуур баһаара баара бэлиэтэнэр (10 тыһ. 438 гектар).
От ыйын 18 күнүгэр Егор Борисов Нам, Кэбээйи уонна Уус Алдан улуустарыгар тыҥааһыннаах балаһыанньа үөскээбит учаастактарын бөртөлүөтүнэн кэрийэн көрдө. Кинини кытары көтүүгэ Россия Ыксаллаах быһыыга-майгыга министиэристибэтин Саха сиринээҕи управлениетын начаалынньыгын солбуйааччы Евгений Рощин, Нэһилиэнньэ олоҕор куттал суох буолуутун хааччыйар судаарыстыбаннай кэмитиэт бэрэссэдээтэлин солбуйааччы Дмитрий Лепчиков, Кэбээйи улууһун баһылыга Игнатий Спиридонов сырыттылар.
Ойуур хаһаайыстыбатын департаменын салайааччы Вячеслав Попов уонна «Ойуур харыстабылын авиациянан хааччыйыы Дьокуускайдааҕы базата» судаарыстыбаннай-бүддьүөт тэрилтэтин начаалынньыга Владимир Леонов Егор Афанасьевичка ойуур баһаардарын умуруорууга ыытыллыбыт үлэни-хамнаһы билиһиннэрдилэр. Ол курдук, турбут уоту боһойор дьаһаллар эрдэттэн ылыллыбыттар. Ордук элбэх сыра-хара Уус Алдан Кылаайытыттан 1,1 көстөөх, Кэбээйи Батамайыттан бэрт чугас турбут ойуур баһаарын умуорарга барбыт, баһаарынай сулууспа десантниктарын таһынан, олохтоохтор тардыллыбыттар. Ол түмүгэр нэһилиэнньэлээх пууннарга уот суоһуур куттала суох оҥоһуллубут. Ыйы быһа турбут кураан кэнниттэн түспүт кэтэһиилээх ардахтартан баһаар намырыйбыт курдук буолбут. Ол эрээри, холкутуйар сатаммат, күнү-дьылы кэтээн көрөөччүлэр сотору эмиэ кураайы күннэр саҕаланыахтара дииллэр.
Өрөспүүбүлүкэ баһылыга хонтуруолу мөлтөппөккө, турбут уоту барытын умуруоран иһэр дьаһалы ыларга сорудахтаата. Батамай уонна Кылаайы олохтоохторун кытары көрүстэ.
Раиса СИБИРЯКОВА, “Саха сирэ” хаһыат, edersaas.ru
Мария Васильева (ЯСИА) хаартыскаҕа түһэриилэригэр: бөртөлүөтүнэн кэрийэн көтүү кэмигэр.