“Билигин аан дойдуга буола турар быһыыны-майгыны дириҥник ырытан, ырыҥалаан көрөрбүт наада. Украинаҕа тахсыбыт быһыы-майгы бу дириҥ силистээх”, – диэн этэр сенатор Егор Борисов бүгүн пресс-конференциятын кэмигэр.
Санатан эттэххэ, олунньу 21 күнүгэр РФ бэрэсидьиэнэ Владимир Путин Донецкай уонна Луганскай Народнай Өрөспүүбүлүкэлэр тутулуга суох буолууларын уонна суверенитеттарын билинэр туһунан уураах таһаарбыта. Ону сэргэ бу өрөспүүбүлүкэлэргэ Арассыыйа көмөлөһүөҕүн туһунан иһитиннэрбитэ. Тута сөрөөн олунньу 22 күнүгэр Федерация Сэбиэтэ Донецкай уонна Луганскай Народнай Өрөспүүбүлүкэлэргэ Арассыыйа көмөтүн туһунан дуогабардары ратификациялаабыта.
– Федерация Сэбиэтин чилиэннэрэ бу дуогабардары сүүс бырыһыан өйөөбүттэрэ. Ити күн Арассыыйа Сэбилэниилээх күүстэрин дойдубут таһыгар таһаарарын туһунан тустаах уурааҕы ылыммыппыт. Итинэн Федерация Сэбиэтэ РФ бэрэсидьиэнэ Владимир Путин таһаарбыт уураахтарын туох да боппуруоһа суох ылыммыта уонна өйөөбүтэ, – диэн бэлиэтиир Егор Афанасьевич.
Кини иһитиннэрбитинэн, кэлиҥҥи кэмҥэ аан дойдуга тахсыталаабыт быһыыга-майгыга Арассыыйа бэйэтин сэбилэниилээх күүһүн тас дойдуларга таһаарарын туһунан уурааҕы Федерация Сэбиэтэ иккитэ ылына сылдьыбыт.
– Маннык уураахтары кэлиҥҥи сылларга Федерация Сэбиэтэ иккитэ ылына сылдьыбыта. 2014 сыллаахха Донецкай уонна Луганскай Народнай Өрөспүүбүлүкэлэр тэриллиилэрин саҕана Украина бэйэтин күүһүн бу өрөспүүбүлүкэлэргэ ыытарын туһунан иһитиннэрбитигэр, өрөспүүбүлүкэлэр оччотооҕу салайааччылара РФ бэрэсидьиэнигэр Владимир Путиҥҥа тахсан көмө көрдөөбүттэрэ. Федерация Сэбиэтэ ити сыл эмиэ Арассыыйа сэбилэниилээх күүһүн тас дойдуларга таһаарарын көҥүллээбитин кэннэ, Минскэйдээҕи сөбүлэҥ түһэрсиллибитэ. Ол эрээри Минскэйдээҕи сөбүлэҥи Украина бэйэтин өттүттэн, хомойуох иһин, бу сыллар тухары толорбото. Иккиһинэн, 2015 сыллаахха Сирияҕа тахсыбыт быһыыны-майгыны туоратыыга Сирия бэрэсидьиэнэ Башар Асад эмиэ Арассыыйаттан көмө көрдөөбүтэ. Билэргит курдук, Ирак кэнниттэн Сирияҕа терроризм бөлөхтөрө тэриллэн кутталы үөскэтэ сылдьыбыттара. Манна эмиэ Арассыыйа бэйэтин көмөтүн ыытан, билигин Сирия сэриитэ суох олорор. Бу икки дьаһаныы, көрөргүт курдук, или-эйэни олохтуурга туһуламмыттара, – диэн этэр кини.
Украинаҕа тахсыбыт быһыы-майгы туохтан саҕаламмытай? Бу боппуруоска хоруйдаан Егор Борисов: “Арассыыйа куттала суох буолуутун, кыраныыссатын “кыһыл сурааһынын” дойдулар кэспэттэрин туһунан кэпсэтии уруккуттан ыытыллар. Ол эрээри арҕааҥҥы дойдулар биһиги дойдубут көмүскэллээх, куттала суох буолуутугар туох да мэктиэлээһини биэрбэтэхтэрэ. Бу туһунан сиһилии кэпсэтии өссө ахсынньыга буолбута да, биһиги дойдубут туох да күттүөннээх хоруйу ылбатаҕа. Украина улахан дойду, сэбилэниилээх күүһэ да улахан, ону таһынан арҕааҥҥы дойдулартан көмөнү эмиэ ыла олорор. Бу анал операция, Донбааһы көмүскээһин, биэс күн салҕанан баран иһэр. Бастакы хардыы баар – бэҕэһээ Арассыыйа уонна Украина биир остуолга олорон кэпсэтиини саҕалаатылар. Кэпсэтии өссө да бара турар. Онон бу дириҥ силистээх-мутуктаах боппуруос, итини хас биирдиибит сөпкө өйдөөн, дириҥник ырытан көрөрө наада”, – диэн этэр.
Аграфена КУЗЬМИНА