Амма – Уус Маайа хайысхатынан массыына суолун тутуу саҕаламмыта быданнаата. Туох барыта бүтэр уһуктаах дииллэринии, чугастааҕы кэмҥэ уус маайалар кэтэһиилээх-күүтүүлээх суоллара тутуллан силигэ ситиэхтээх.
edersaas.ru
Бүгүҥҥү туругунан 8 км кэриҥэ суол оҥоһуллара хаалла. Бу күһүн суолу официальнайдык туттарыахтара. Ил Дархан Егор Борисов суруналыыстары кытары көрсүһүүтүн кэмигэр, Уус Маайа суруналыыһа Марианна Караканова салгыы Хабаровскай кыраайга диэри суолу тутан, Охотскай муораҕа тахсыахха сөбүн туһунан санаатын эттэ. Икки сыллааҕыта Саха сирэ Хабаровскай кыраай Охотскай оройуонугар сылдьан 2020 сылга диэри бииргэ үлэлээһин былааныгар илии баттаспыта. Онно «Амма» өрөспүүбүлүкэтээҕи суол оҥоһулуннаҕына,урукку өбүгэлэрбит суолларынан, Хабаровскай кыраай сирин нөҥүө, Охотскай муораҕа быһа тахсыы туһунан кэпсэппиттэрэ.
Билиҥҥитэ, Саха Өрөспүүбүлүкэтэ мууһунан бүрүллэр Лаптев уонна Илиҥҥи Сибиир муораларга эрэ тахсар кыахтаах.
Егор Афанасьевич Хабаровскай кыраайы уонна Саха өрөспүүбүлүкэтин социальнай-экономическай сайдыыларыгар Охотскай муораҕа тахсыы төһүү күүһүнэн буолуон сөбүн эттэ. «Сырыылаах-айаннаах ириэнэх муораҕа тахсыы өрөспүүбүлүкэҕэ экономическай көдьүүһэ улахан» буолуоҕун бэлиэтээтэ.
Анивера АКИМОВА, edersaas.ru